Dúnıejúzilik densaýlyq saqtaý uıymy bıylǵy qysta koronavırýstyń ekinshi tolqynyna daıyndalýǵa shaqyrady. Bul týraly Qamshy tilshisi Daily Telegraph-qa silteme jasap habarlaıdy. 

Dúnıejúzilik densaýlyq saqtaý uıymynyń basshysy koronavırýs sanynyń kún saıyn tómendeýine baılanysty bosańsýǵa bolmaıtynyn eskertti. DDU Eýropalyq aımaǵynyń dırektory Doktor Hans Klýge koronavırýstyń tumaý sıaqty basqa da maýsymdyq aýrýlarmen uqsastyǵyn, soǵan qatty alańdaýly ekenin málimdedi. 

Onyń aıtýynsha, qazir memleketter kóp pasıentterdi qabyldaýǵa daıyn bolýy úshin aýrýhana tósekterin arttyrý arqyly densaýlyq saqtaý júıesin nyǵaıtýdyń ýaqyty keldi.

DDU basshysynyń eskertýi boıynsha, kúndelikti jaǵdaı men ólim sany azaıyp jatsa da, qazir búkil Eýropada «mereke emes, daıyndalý» ýaqyty bolý kerek.

–Bul aýrýhanalarda, alǵashqy medısınalyq kómek jáne reanımasıa bólimshelerinde áleýetti arttyrýdy bildirýi múmkin,–dedi ol.

–Sıngapýr men Japonıa bul mereke emes, daıyndyq kezeńi ekenin erte túsindi. Skandınavıa elderi osylaı istep jatyr. Olar ekinshi tolqynnyń paıda bolýyn joqqa shyǵarmaıdy. Meni eki tolqyn qatty alańdatady: kúzde bizde Kovıdtiń ekinshi tolqyny jáne maýsymdyq tumaý nemese qyzylshanyń taǵy bir tolqyny bolýy múmkin,– dedi Doktor Klýge.