QR DSM Taýarlar men kórsetiletin qyzmetterdiń sapasy men qaýipsizdigin baqylaý komıtetiniń tóraǵasy Tımýr Sultanǵazıev jazda koronavırýstyń taralýynyń tómendeýi kún sáýlesine nemese temperatýraǵa baılanysty emes dep aıtty. 

– Vırýstyń (koronavırýstyń) jańadan paıda bolǵanyn, buryn-sońdy bolmaǵandyǵyn túsiný qajet. Zertteýler barysynda egjeı-tegjeıleri shyǵyp jatady. Biraq, jazdaǵy temperatýranyń áseri jaz kezeńinde maýsymdyq tumaýdyń nemese JRVI-diń tómendeýine negizgi sebep emestigin aıyra bilý kerek. Jyl saıyn JRVI-di tek qana kúzde, kóktemde tirkemeımiz. Qysta, tipti jazda da tirkeledi, – dedi T. Sultanǵazıev.

Degenmen, komıtet basshysynyń aıtýynsha, jaz aılarynda tumaý men JRVI az tirkeledi.

– Bul, eń birinshi kezekte, kún sáýlesine nemese temperatýraǵa baılanysty emes. Jazda ǵımarattardy jeldetip alýǵa múmkindik týyp, qorshaǵan ortada vırýstardyń sany aıtarlyqtaı artatyn jabyq ǵımarattarda adamdardyń shoǵyrlanýy azaıady. Al boljamǵa keler bolsaq, vırýs ózin aldaǵy ýaqytta qalaı ustaıtyndyǵyn eshkim dóp basyp aıta almaıdy, – dep atap ótti.