Úkimet COVID-19 ınfeksıasyna PSR ádisimen analız alýǵa 5,4 mlrd teńge qarjy bóldi. Bir testiń baǵasy shamamen 11,5 myń teńge turady. Osy rette Áleýmettik medısınalyq saqtandyrý qory Almaty qalalyq fılıaly testten tegin nezde kimder óte alatynyn habarlady.

Fılıal málimetinshe, zertteýge bólingen qarajattyń 1,7 mlrd teńgesi stasıonarlarǵa, 3,7 mlrd teńgesi – konsýltatıvtik-dıagnostıkalyq kómek kórsetetin emhanalarǵa berilmek. Pasıentter atalǵan emdeý mekemelerinde testi tegin tapsyra alady. Tekserýden tegin ótetin sanattar:

• COVID-19 ınfeksıasyn juqtyrǵan bolýy múmkin degen kúdikpen provızorlyq stasıonarǵa jatqyzylǵan pasıentter;
• Ótkir respıratorlyq juqpaly aýrý men pnevmonıa belgileri anyqtalǵan azamattar;
• Koronavırýs juqtyrǵandarmen jaqyn baılanysta bolǵandar;
• Josparly túrde stasıonarǵa jatyp emdeletin pasıentter;
• Tynys joldary, endokrındik jáne júrek-qan tamyry júıeleri aýrýyna baılanysty dınamıkalyq baqylaýǵa alynǵan, jasy 50-den asqan pasıentter;
• Shetelden kelgender;
• İİM-niń juqpaly aýrýdyń aldyn alýǵa jumyldyrylǵan qyzmetkerleri;
• Júkti áıelder jáne t.b.

Habarlamaǵa súıensek, qazir «Ulttyq saraptama ortalyǵy» úıde karantınde otyrǵandardy; arnaıy kontıgent (aýrý juqtyrý qaýpi joǵary jáne respıratorlyq syrqat belgileri bar medısına qyzmetkerleri, epıdemıaǵa qarsy is-sharalarǵa jumyldyrylǵan memlekettik organdardyń qyzmetkerleri, qarttar úıi, ınternat pen ózge de arnaıy mekemelerdiń turǵyndary) pen áskerge shaqyrylǵan azamattardy PSR-tekserýden ótkizip jatyr. Test ortalyq qarajaty esebinen tegin jasalady.

«Aımaqtarǵa beriletin test sanyn jergilikti atqarý organdary anyqtaıdy. Qazirgi tańda 600-den astam medısına uıymymen COVID-19 vırýsyna qatysty zertteý jumysyna qatysý týraly kelisim bekitilgen» delingen habarlamada.

Koronavırýstyń taralýyna jol bermeý sharalaryna respýblıka búdjetinen 55,9 mlrd teńge bólingen. Qarjynyń operatory – Medısınalyq saqtandyrý qory. Onyń 14,7 mlrd teńgesi – ınfeksıalyq, provızorlyq jáne karantındik stasıonarlarda jatqan pasıentterdi emdeýge, 35,8 mlrd teńgesi – vırýstyń taralýyna qarsy is-sharalarǵa jumyldyrylǵan medısına qyzmetkerleriniń jalaqysyna ústemaqy tóleýge, 5,4 mlrd tıeńgesi – dıagnostıkalyq zertteýlerge (PSR-test) jumsaldy.