Shahar basshysy Baqytjan Saǵyntaev qalalyq máslıhattyń depýtattarymen qaladaǵy epıdemıologıalyq jaǵdaıdy, karantın kezeńinde sanıtarlyq qaýipsizdikti qamtamasyz etý jáne qalanyń qalypty tirshiligi men Exit Strategy ekonomıkasynyń kezeń-kezeńimen qalpyna keltirý josparyn júzege asyrý boıynsha qabyldanyp jatqan sharalardy talqylady.

Beıne-konferens-baılanys rejıminde ótken kezdesýde koronavırýstyq ınfeksıaǵa qarsy is-qımyl jáne epıdemıologıalyq jaǵdaıdy turaqtandyrý sharalary boıynsha máseleler pysyqtaldy. Sondaı-aq kásiporyn qyzmetin kezeń-kezeńimen qaıta jańǵyrtýǵa erekshe toqtaldy. Aldyn ala málimetter boıynsha, 20 sáýirden bastap sanıtarlyq qaýipsizdikti saqtaý aýdıtinen keıin jumyspen qamtylǵandar sany 540 myń adamǵa jetti. Sonyń ishinde 200 myńǵa jýyǵy oblystyń turǵyndary. Al 25 mamyrdan taǵy 84,2 myń adam jumysqa shyǵady.

Qala ákimi Baqytjan Saǵyntaevtyń aıtýynsha, ekonomıkany qalpyna keltirýdiń negizgi baǵdarlamalary men tetikteri retinde «Jumyspen qamtýdyń jol kartasy», shaǵyn jáne orta bıznesti qoldaý, turǵyn úı qurylysy, údemeli bilim berý nysandarynyń qurylysy bolyp tabylady.

– Jumyspen qamtýdyń jol kartasy» aıasynda 2020-2021 jyldarǵa jalpy somasy 103,9 mlrd. teńge bolatyn 214 jobany iske asyrý josparlanǵan. Sondaı-aq áleýmettik-mádenı jáne TKSH nysandaryn, kólik ınfraqurylymyn kúrdeli, ortasha jáne aǵymdaǵy jóndeýden ótkizý, qaıta jóndeýden ótkizý men qurylys júrgizý, eldi-mekenderdi abattandyrý kózdelgen. Buǵan qosa 26 myńǵa jýyq jumys orny qurylatyn bolady. Joba paıdalanýǵa berilgennen keıin 2 myńnan astam turaqty jumys orny ashylmaq, – dedi Saǵyntaev.

Sondaı-aq shahar basshysy shaǵyn jáne orta bıznesti qoldaý basym mindetterdiń biri ekenin tilge tıek etti. Bul sheshimdi júzege asyrý arqyly Almatynyń eldiń qarjy jáne iskerlik ortalyǵy retinde qalyptasýyna tolyq negiz bola alatynyn erekshe atap ótti.

Ákimdik uıytqy bolǵan negizgi baǵdarlama Almaty Business-2025 bolyp tabylady. Sonymen qatar, ótken jyldan bastap respýblıkada «bir tereze» qaǵıdaty boıynsha jumys isteıtin jalǵyz Qoldaý kásipkerlik ortalyǵy qyzmet kórsete bastady. Indýstrıaldy aımaqtyń jumysy jandanyp, shaǵyn ónerkásiptik parkter qurylýda.

Atalǵan jobalar aıasynda «Eńbek»,«Qarapaıym zattar ekonomıkasy», «Damý» KDQ arqyly jobalardy qoldaý sheńberinde kásipkerlik salasynda 10 myńnan astam jumys ornyn ashý josparlanýda.