Aqtóbede koronavırýs juqtyrǵan áıel qaıtys boldy. Bul týraly Aqtóbe oblystyq densaýlyq saqtaý basqarmasynyń jetekshisi Áset Qalıev habarlady, dep jazady Moı gorod saıty. 

Áıel ınfeksıalyq aýrýhanada nebári bir kún bolǵan. Palatada kenet jaǵdaıy nasharlaǵan. Dárigerler reanımasıalyq emdeý sharalaryn júrgizgenmen júregi toqtady. Klınıkalyq baqylaý ókpe arterıasy embolıasynyń asqynǵanyn kórsetken. Bul koronavırýs ınfeksıasymen baılanysty emes. Naýqas PSR tekserýden ótip, koronavırýs ınfeksıasy anyqtalǵan. Biraq naýqasta koronavırýspen qatar kóp aýrý tabylǵan. Júrek-qantamyr aýrýyna shaldyqqandar esebinde turǵan. Vırýs naýqastyń jaǵdaıynyń nasharlaýyna áser etti me, joq pa, ony komısıa sheshedi, - dedi basqarma jetekshisi.

Áset Qalıevtiń aıtýynsha, Aktóbe oblysynda koronavırýs juqtyrǵan 250 jaǵdaı tirkelgen. Sondaı-aq  63 naýqas stasıonarda jatyr. Ekeýi - reanımasıa bóliminde. Bireýiniń jaǵdaıy - óte aýyr, jasandy tynys alý apparatymen demalyp jatyr. Ekinshi naýqastyń jaǵdaıy - aýyr. Naýqastar arasynda 17 bala bar, 10-y jazylyp shyqqan.