Mańǵystaýda túlekterge atestat 3-4 maýsymda tabystalady. Bul týraly qoǵamdyq komýnıkasıa ortalyǵynda ótken brıfıńte MO bilim basqarmasynyń basshysy Asqar Seıdalıev málimdedi.

Atestat tapsyrý rásimi 3-4 maýsymda ótkiziledi. Bul merekeniń ereksheligi – saltanatty túrde atestat beriledi jáne sońǵy qońyraý soǵylady. Túlekter ádettegi mektep formasymen qatysady. Shara mindetti túrde mektep qabyrǵasynda, taza aýda, tek 11 synyp oqýshylar men ata-analardyń qatysýymen jáne barlyq sanıtarlyq normalardy saqtaı otyryp ótkiziledi.

Mektepterde atestat tabystaý barysynda kelesi sharalar qabyldanady:

• Sharalardyń ótkizilýi ár synyp úshin 40 mınýttan aspaıdy jáne sharalar arasyndaǵy ınterval kem degende 20 mınýtty quraıdy;
• Ár is-sharadan keıin mekteptiń tehnıkalyq qyzmetkerleri ótetin oryndy zalalsyzdandyrady;
• Paraleldi synyptardyń túlekteri men ata-analarynyń túıisýine jol berilmeıdi.

Qazirgi kezde mektep basshylyǵy tarapynan túlekter men olardyń ata-analaryna mektep bitirýshilerdiń is-sharalarynyń kestesi, karantın kezeńindegi balalar men ata-analar tarapynan sanıtarlyq talaptar saqtalýy týraly  aldyn ala  habarlanyp jatyr.