«Halyqqa adal qyzmet» (HAQ) partıasyn qurý boıynsha bastamashyl top jetekshisi Toǵjan Qojalıeva "Saıası partıalar týraly" zańǵa prezıdenttiń qol qoıýy parlament saılaýy merziminen buryn ótetinin bildirmeıdi degen pikirde.

– Prezıdent saılaýy kezinde kóptegen zań buzýshylyqtar tirkeldi. Sondyqtan  qazir máslıhat pen májilis saılaýy ótip, ol jerde de zańsyzdyqtar bolyp jatsa, onda halyqaralyq arenada eldiń saılaý júıesiniń ádildigine kúmán kúsheıedi. Eýropadaǵy qaýipsizdik jáne yntymaqtastyq uıymynyń (EQYU) osyndaı tujyrymy bar. Men eldegi beldi sheneýniktermen sóılesip, jaǵdaıdan habardar bolyp otyrmyn. Olardyń aıtýynsha, Parlament saılaýy merziminde bolady dep boljanýda, – dedi Qojalıeva.

Bastamashyl top jetekshisi saılaý týraly zańǵa birshama ózgerister engizý qajet dep esepteıdi. 

– Jalpy saılaý týraly zańda áıelder men jastarǵa arnalǵan kvotalardy partıalyq tizimge engizý talaby qoıyldy. Bul – negizi durys. Biraq atalǵan ózgeristen basqa da ózgerister engizý kerek edi. Saılaý aldyndaǵy ártúrli shekteýlerdi alyp tastaý qajet. Máselen, prezıdent saılaýyna túskisi keletin adamnyń memlekettik qyzmette 5 jyldyq tájirıbesi bolýy mindetti degen norma. Sondaı-aq parlamentke ótý tabaldyryǵyn 7 paıyzdan, keminde 5 paıyzǵa tómendetý qajet, – dedi ol. 

Toǵjan Qojalıeva bıliktiń partıany tirkeýde múshe sanyn 40 myń adamnan 20 myń adamǵa azaıtýy saıası reforma úshin jetkiliksiz dep esepteıdi.

– Qazaqstanda partıany tirkeýden ótkizý óte qıyn. Jańa zańdaǵy partıa tirkeýge qajetti 20 myń músheniń ózi saıası reforma úshin azdyq etedi. Máselen kórshiles Reseıdi alyp qarasaq, onda partıa tirkeý úshin 500 adam múshelikte bolsa jetkilikti. Sıez ózin ótkizý úshin 100 adam ǵana kerek. Negizi halyqtyń arasyndaǵy bedeldi partıaǵa 20 myń qol jınaý qıyn emes. Biraq ulttyq qaýipsizdik komıteti nemese basqa da zań organdary sol adamdar arasynan «Biz mundaıǵa qol qoımadyq» degen 100, ne 20 adamdy shyǵarýy ǵajap emes. Mundaıda partıa músheleri UQK-niń májbúrleýimen aıtqandarynan taıqyp ketýi múmkin, – deıdi bastamashyl top jetekshisi.

Onyń aıtýynsha, qazirgi ýaqytta partıa qurýǵa qajetti yntaly topqa kiretin myńnan asa adamnyń qoly daıyn. 

– Qazirgi ýaqytta qaramaǵymda 1000-nan asa adam bar. Sondaı-aq 20 myń adamdy jınaý júrip jatyr. Bizdiń naqty daıyndaǵan baǵdarlamamyz bar. Sol baǵdarlamadaǵy talaptardy oqyp, kórip, sony qoldaǵan adamdardy ǵana múshelikke qabyldaımyz. 20 myń adamdy jınaýdaǵy eń basty maqsat – máslıhattarǵa kirý. Bizdiń oıymyzsha májilisten buryn, elimizde máslıhat mańyzdy. Óıtkeni ár aýdannyń óziniń máseleleri, suraqtary bar. Solardy sheshý qajet. Al májiliste tek zańdardy qarastyrady. Partıanyń ustanymy – elimizde barlyǵyna birdeı múmkindik baryn kórsetý, – dep sózin túıindedi.