İshki ister mınıstrligi 25 mamyrda Almaty oblysyndaǵy blok-bekette  bolǵan qaıǵyly oqıǵanyń sebep-saldaryn anyqtady. Osy oqıǵada eki polısıa qyzmetkeri qaza tapqan bolatyn. Tekseris kezinde jeke quram arasynda aldyn alý jumystaryn júrgizýde olqylyqtar bolǵany anyqtaldy. Tártip buzǵan qyzmetkerlerge qatysty der kezinde tıisti sharalar qoldanylmaǵan.

Sonymen qatar, BAQ-qa aqparatty burmalap usyný faktilerine baǵa berildi. Qyzmettik tekserý qorytyndysy boıynsha İshki ister mınıstri Erlan Turǵymbaevtyń buıryǵymen basshylyq qyzmette júrgen toǵyz polıseıge qatysty tártiptik jazalaý sharasy qabyldandy.

– Almaty qalasy PD Patrúldik polısıa polki komandıriniń orynbasary polısıa podpolkovnıgi Q.E. Sataev;

– Almaty qalasy PD Kadr saıasaty basqarmasynyń basshysy polısıa polkovnıgi O. S. Myrzabekov;

– Almaty qalasy PD Jeke quram boıynsha ınspeksıa basshysy polısıa podpolkovnıgi A.O. Aqylbekov atqaryp júrgen laýazymdarynan bosatyldy.

– Almaty qalasy PD Jergilikti polısıa qyzmetiniń basshysy polısıa polkovnıgi M. A. Sattarovqa (buryn polk komandıri qyzmetin atqarǵan);

– Almaty qalasy Ózindik qaýipsizdik basqarmasynyń basshysy polısıa podpolkovnıgi S.O. Kókirekbaevqa;

– Almaty qalasy PD basshysynyń orynbasary polısıa polkovnıgi A.A. Nasharbekovke qyzmetine tolyq sáıkes emestigi eskertildi.

– Almaty qalasy PD basshysynyń birinshi orynbasary polısıa polkovnıgi N. S Almasbekovke, Almaty qalasy PD-niń bólim basshysy polısıa podpolkovnıgi S.K. Ázirbekke qatań sógis jarıalandy.

Almaty qalasy Polısıa departamentiniń basshysy Q.D.Taımerdenovke senip tapsyrylǵan bólimsheniń qyzmetin uıymdastyrýdaǵy kemshilikteri úshin qatań sógis jarıalandy.

– Árbir basshy óziniń qaramaǵyndaǵylarǵa jaýapty. Ol jeke quram arasynda tártip pen zańdylyqty saqtaýdy qamtamasyz etedi. Bul jumys Almaty qalasynyń Polısıa departamentinde tıisti deńgeıde uıymdastyrylmaǵan. Nátıjesinde biz birden eki qyzmetkerden aıyrylyp qaldyq, bir qyzmetker aýyr dene jaraqatyn aldy. Bizdiń barlyǵymyz úshin, ásirese, týǵan-týysqandarymyz úshin bul – úlken qaıǵy-qasiret jáne orny tolmas qaza. Sondyqtan bul tótenshe jaǵdaıǵa jol bergen basshylarǵa tıisti sharalar qabyldandy. İİM basshylyǵy aldaǵy ýaqytta da qyzmettik tártipti saqtaýdy qatań talap etip, polısıa qyzmetkerleriniń kez kelgen tártip buzýshylyǵyna prınsıpti baǵa berip, jańa jaǵdaıda jumy istegisi kelmeıtin nemese jumys isteı almaıtyn adamdardan óz qataryn tazalaıtyn bolady, – dep atap ótti İshki ister mınıstri Erlan Turǵymbaev.

Eske sala ketsek, 25 mamyr kúni tańǵa jýyq № 4 blokposta BMW júrgizýshisi mas kúıinde beton qorshaýǵa soǵylyp baryp, ınersıamen patrúldik polısıa kóligin soqqan. Jol-kólik oqıǵasynan eki polısıa qyzmetkeri kóz jumdy. Taǵy bir polıseıdiń jaǵdaıy aýyr.