BQO kámeletke tolmaǵandardyń isteri jónindegi mamandandyrylǵan aýdanaralyq sotynyń  úkimimen «Ata-anasynyń qamqorlyǵynsyz qalǵan jáne jetim balalarǵa arnalǵan №15 oblystyq kómekshi mektep-ınternaty» MM-nyń burynǵy tárbıeshisi N. Ihsanova QR QK-niń 137-babyna (kámeletke tolmaǵan balany tárbıeleý jónindegi mindetterin  oryndamaýy) sáıkes úsh jyl merzimge muǵalimdik qyzmetpen aınalysý quqyǵynan aıyrylyp, bir jyl merzimge sottaldy.

Oblystyq prokýratýranyń baspasóz qyzmetinen habarlaǵanyndaı, atalǵan qylmystyq isti Oral qalasy ishki ister basqarmasy ýchaskelik ınspektory D. Muqaevtyń qylmystyq is qozǵaýdan bas tartý týraly qaýlysyn  buzý jolymen Oral qalalyq prokýratýrasy qozǵaǵan bolatyn.

Sotta anyqtalǵanyndaı, N. Ihsanova atalmysh mektep-ınternatta tárbıeshi qyzmetin atqara júrip, mektep muǵaliminiń joǵalǵan aqshasyn tabý anyqtaý maqsatynda oqýshynyń keýde tusynan shymshylap, jábir kórsetken. Onymen qoımaı, sol kúni kámeletke tolmaǵan tárbıelenýshiniń eki  qolyn ystyq útikpen kúıdirip, eki bileginiń terisine 1-2-shi dárejeli kúıik salǵan. Jábir kórgen eki oqýshy da aqyl-oıynda kemistigi bar jáne sóıleý qabileti buzylǵan balalar.

İs boıynsha qatysqan memlekettik aıyptaýshy sottan N. Ihsanovany QR QK 137-babymen aıypty dep tanyp, úsh jyl merzimge muǵalimdik qyzmetpen aınalysý quqyǵynan aıyryp, eki  jyl merzimge bas bostandyǵyn shekteý jazasyn taǵaıyndaýdy suraǵan bolatyn. 

Erjan Eraly

"QazAqparat"