Almaty oblysy ákiminiń baspasóz qyzmeti koronavırýs ınfeksıasynan  89 jastaǵy qarıanyń emdelip shyqqanyn habarlady.

Oblysta koronavırýstan aıyqqan 2 adam Kegen aýdany men Qapshaǵaı qalasynyń turǵyndary. Olardyń bireýi – 1962 jyly týǵan azamat, ekinshisi - 89 jastaǵy qarıa.

1931 jyly dúnıege kelgen Kegen aýdanynyń turǵyny Kúmisqan Orazaqynova Shelek aýylyndaǵy aýdandyq aýrýhanada 4 mamyrdan bastap em qabyldaǵan. Atalǵan aýrýhananyń bas dárigeri Gúlnar Kýrametovanyń aıtýynsha, pasıent aýrýhanaǵa túsken kezde jaǵdaıy ortasha aýyrlyqta bolǵan.

– Aýrýhanaǵa túsken kezde pasıenttiń jas ereksheligin eskere otyryp, reanımasıa bólimine ornalastyrdyq. Óıtkeni qan qysymynyń joǵary bolýy kez kelgen aýrýdy asqyndyrýy múmkin. Sondyqtan qatań baqylaýda ustadyq. Búgin pasıent koronavırýs ınfeksıasynan tolyq aıyǵyp shyqty, – dedi bas dáriger.

Qazir indetten aıyqqan 2 turǵynnyń da jaǵdaıy jaqsy, densaýlyqtaryna shaǵymy joq.

Sóıtip, Almaty oblysynda COVID-19 ınfeksıasynan jazylǵandar sany 178-ge jetti.