«Almaty» telearnasynyń «Sheshimi bar» baǵdarlamasy arqyly tórtinshi otbasy baspanaly boldy, dep habarlaıdy Almaty.tv.

Sanjar Begimbetov – 10-synyp oqýshysy. Ol Almaty qalasy Naýryzbaı aýdanynda anasymen birge aıadaı ǵana tar bólmeli páterdi jaldap turady. Osydan 5 jyl buryn janarynan aıyrylǵan anasy jumyssyz úıde otyr. Anasynyń densaýlyǵyna baılanysty kúnkórisi nasharlap ketken soń, Sanjardyń erte jastan eńbekke aralasýyna týra keledi.

«12 jasymnan jumys isteı bastadym. Bastapqyda bazarǵa shyǵyp nan satyp júrdim. Bar tapqan aqshamdy anama ákelip beremin. Óıtkeni, páteraqy, komýnaldyq tólemder, kúndelikti azyq-túlik sıaqty shyǵyndardyń bárin tóleý úshin aqsha kerek boldy», - deıdi Sanjar.

Sanjar anasynyń kózi qalpyna kelse dep armandaıdy. Emdetýge qarajaty jetpeıdi. Dárileri de qymbat. Qazir ol úıiniń janyndaǵy kólik jýý beketinde jumys isteıdi. Kúndelikti sabaǵy aıaqtalǵan soń osynda kelip, 2-3 myń teńge tabady. Bar tapqanyn jınap, anasy ekeýi qajetti shyǵyndaryna jetkizýge tyrysady.  

«5 jyl buryn qos janarymnan aıyrylyp qaldym. Joldasym tastap ketken... Jaldamaly páterge 15 myń teńge, gaz ben jaryq úshin 4 myń teńge tólep turyp jatyrmyz. Buryn tiginshilikpen aınalysqanmyn. Qazir ózdigimnen júrip-tura almaımyn... Otbasymyzdyń bar aýyrtpalyǵy 10-synyp oqıtyn ulymnyń moınynda», - dep kózine jas alady jalǵyzbasty ana Qamash Bekimbetova.

Úshinshi maýsymy kórermenderge jol tartqan «Sheshimi bar» áleýmettik baǵdarlamasynyń búgingi keıipkeri Sanjar mektep bitirgen soń oqýǵa tegin túse alatyn boldy. Sondaı-aq, anasynyń kóz janaryn tolyq tekserýden ótkizip, múgedektikke shyǵarýǵa múmkindik aldy. Qujattaryn qalpyna keltirýge naqty áreketter jasaldy. Eń bastysy, baǵdarlamada «Hareket» qaırymdylyq qory muńlyq jandardyń armanyn oryndap, baspana kiltin tabys etti! Bul – «Sheshimi bar» baǵdarlamasynda muqtaj jandarǵa tabystalǵan tórtinshi baspana.