NASA aýa raıynyń qolaısyzdyǵyna baılanysty ushyrylymnyń keıinge shegerilgenin jarıalady. Bul týraly Qamshy tilshisi NASA-nyń tikeleı translásıasyna silteme jasap habarlaıdy.

Tikeleı efırde ushyrylymnyń aldaǵy úsh kúnde bolatyny aıtyldy. Sońynda aldaǵy senbiniń tańdalǵany jarıalandy. Senbi kúni jergilikti ýaqyt boıynsha tústen keıin saǵat 15:22-ge ózgertilgeni naqtylandy. Alaıda ol kúni de aýa raıy qolaısyz bolsa, jospardyń taǵy ózgerýi múmkin ekeni de eskertildi. Aýa raıynyń aldaǵy ushyrylymǵa yqpal etý múmkindiginiń 40 paıyz ekeni habarlandy.

Aıta keteıik, NASA ǵaryshkerleri AQSH topyraǵynda 2011 jyldan beri alǵash bolatyn ǵaryshqa ushýǵa daıyndalýda. 2011 jyldan beri olar ǵaryshqa Baıqońyrdan ushyp kelgen. 

Ushyrylym bolatyn kún "amerıkalyq ǵaryshtyq baǵdarlamanyń jańa dáýiri bastalatyn kún" dep sıpattalýda.

Amerıkalyq eki ǵaryshkerdiń Halyqaralyq ǵarysh stansıasyna ushý ýaqyty jergilikti ýaqyt boıynsha saǵat 16:33-ke (Almaty ýaqyty boıynsha búgin tańǵy 2:33) josparlanyp, Florıdadaǵy Kennedı ǵarysh ortalyǵynan ushyrylmaq bolǵan. 

Biraq Atlantıda ǵaryshtyq ushýy aıaqtalǵannan keıin amerıkalyq ǵaryshkerlerdiń 9 jyldan bergi alǵashqy ushyrylymy júzege aspady.

Eger senbide bári oıdaǵydaı bolsa, Ilon Masktyń "SpaceX Crew Dragon" ǵarysh kemesi NASA ǵaryshkerleri Robert Bennken men Dýglas Herlıdi Halyqaralyq ǵarysh stansıasyna jetkizedi.

Oqıǵanyń jalpy barysyn tómendegi silteme arqyly kórýge bolady.