Búgin Palata Spıkeri Nurlan Nyǵmatýlınniń tóraǵalyǵymen Májilis Búrosy ótip, onda aldaǵy jalpy otyrystyń kún tártibi naqtylandy.

Palata qaraýyna birqatar depýtattardyń ózderi ázirlegen zań jobalary usynyldy.

Onda depýtattar birinshi oqylymda «Qazaqstan Respýblıkasynyń keıbir zańnamalyq aktilerine aýyldyq eldi mekenderde Internettiń qoljetimdiligin qamtamasyz etý máseleleri boıynsha ózgerister men tolyqtyrýlar engizý týraly»  zań jobasyn qaraıdy.

Májilis Tóraǵasy Nurlan Nyǵmatýlın atap ótkendeı, aýyl turǵyndarynyń jyldamdyǵy joǵary Internetke qol jetkizýi olardyń elektrondy qyzmetterdi kóbirek qoldanýyna múmkindik beredi. Sonyń nátıjesinde, qashyqtyqtan oqytý, bilim berý men medısınany sıfrlandyrý aıtarlyqtaı artatyn bolady.

– Memleket Basshysy Qasym-Jomart Kemeluly Toqaev Ulttyq keńes otyrysynda osyǵan baılanysty naqty tapsyrmalar berdi. Onda bilim berý jáne densaýlyq saqtaý salalaryn jaqsartý týraly mindetter qoıdy. Osylardy jetildirýdyń mańyzdy baǵyty sıfrlyq tehnologıalardy tıimdi qoldanýda osy zań jobasy yqpal etetin bolady, – dedi Nurlan Nyǵmatýlın.

Jalpy telekomýnıkasıalyq ınfraqurylymdy birlesip paıdalaný qazaqstandyq naryqtyń damýyna zor múmkindik beredi.

Sonymen qatar, Palata erekshe qorǵalatyn tabıǵı aýmaqtar máselelerine qatysty zań jobasyn birinshi oqylymda qaraıdy. Osymen birge, shetel valútasyndaǵy ıpotekalyq qaryzdar jáne kórsetiletin tólem qyzmetteri naryǵynyń sýbektilerin retteýdi jetildirý máselelerine týraly zań jobasy birinshi oqylymda usynylady.        

Otyrysta Palata depýtattar ázirlegen aýdıtorlyq qyzmet máselelerine qatysty zańnamalyq túzetýlerdi talqylaýǵa usynatyn bolady.

Kún tártibiniń jobasynda Palatanyń aldaǵy jalpy otyrysynda bıznes-ahýaldy jaqsartýǵa baǵyttalǵan zań jobasy ekinshi oqylymda qaralmaq. 

Sonymen birge, Májilistiń beıindi komıtetteri birqatar jańa zań jobaralaryn jumysqa alatyn bolady. Ol depýtattar  ázirlegen «Jer qoınaýy jáne jer qoınaýyn paıdalaný týraly» Kodekske ýran óndirisine qatysty zań jobasy. Jáne depýtattar bastamashy bolǵan  qaryzdyq eńbekti retteý jáne veterınarıa máselelerine qatysty zań jobalary bar. Otyrysta depýtattar «Maqta salasyn damytý týraly» Qazaqstan Respýblıkasy Zańynyń kúshi joıyldy dep taný jáne Qazaqstan Respýblıkasynyń keıbir zańnamalyq aktilerine ózgerister engizý týraly» zań jobasy týraly qorytyndy ázirlenetin bolady

Májilistiń Baspasóz qyzmeti