QR Senatynyń tóraǵasy Máýlen Áshimbaev ult úshin bastaryn báıgege tikken arystardyń esimderin máńgi ulyqtap ótken jón degen pikirde.

"Biz 31 mamyrdy Saıası qýǵyn-súrgin jáne asharshylyq qurbandaryn eske alý kúni retinde atap ótemiz. Bul – halqymyz basynan ótkergen qasiretti jyldar jańǵyryǵy.⁣⁣⠀
⁣⁣⠀
HH ǵasyrdyń basyndaǵy totalıtarlyq júıeniń saldarynan dástúrli turmysymyz kúshpen ózgertildi. El asharshylyqqa tap bolyp, eki mıllıonǵa jýyq adam kóz jumdy. Júzdegen myń qandasymyz týǵan jerin tastap kóshýge májbúr boldy.⁣⁣⠀
⁣⁣⠀
Saıası qýǵyn-súrgin jyldary da qazaqqa ońaı tıgen joq. Ulttyń kóshin bastaǵan zıaly tulǵalarymyz tar qapastarǵa qamaldy jáne atý jazasyna kesildi. Olardyń jaqyndary da qýdalaýdan qutyla almady.⁣⁣⠀
⁣⁣⠀
Biz osyndaı «tar jol, taıǵaq keshýden» bereke men birliktiń, sabyr men tózimniń, úmit pen senimniń arqasynda aman ótip, ata-babamyz ańsaǵan azattyqqa qol jetkizdik. Az ýaqyttyń ishinde eldiktiń irgesin nyǵaıtyp, táýelsiz memleket qurdyq. Qazirgideı kúrdeli kezeńderdiń ózin abyroımen eńserip kelemiz.⁣⁣⠀
⁣⁣⠀
Qanshalyqty qasiretti bolsa da, tól tarıhymyzdy umytýǵa bolmaıdy. Osyǵan oraı Memleket basshysy tarıhı ádildikti qalpyna keltirý jumystaryn aıaqtap, saıası qýǵyn-súrgin qurbandaryn aqtaý úshin arnaıy memlekettik komısıa qurýdy tapsyryp otyr.⁣⁣⠀

Shyn máninde, Prezıdentimiz atap kórsetkendeı, ótken ǵasyrdaǵy eń qıly kezeńniń birinde jazyqsyz japa shekkenderdiń rýhyna taǵzym etý – barshamyzdyń perzenttik boryshymyz. Sondyqtan tarıhtan taǵylym alyp, ult úshin bastaryn báıgege tikken arystarymyzdyń esimderin máńgi ulyqtap ótkenimiz jón.⁣⁣

Endi eshqashan mundaı zulmat bolmasyn! Táýelsiz Qazaq eli jasaı bersin!" dedi Máýlen Áshimbaev facebook paraqshasynda.