Almaty qalalyq polısıa departamentiniń basshysy Qanat Taımerdenov blokbekette bolǵan jol-kólik oqıǵasyna pikir bildirdi.

Taımerdenov polısıa qyzmetkerleri Jaras Janǵazıev pen Dastan Ábdiqanovtyń qaza bolý faktisi boıynsha tergeý QR qylmystyq kodeksiniń 99-babynyń 2-bólimi boıynsha bastalǵanyn atap ótti.

– İshki ister mınıstri barlyq bólimsheler basshylarynyń is-áreketine prınsıpti baǵa berdi jáne kináli adamdar jazalandy. Sonymen qatar tergeý muqıat júrgizilip jatyr. Ázirge, QR Qylmystyq is júrgizý kodeksiniń «Sotqa deıingi tergeý málimetterin jarıalaýǵa jol berilmeýi» týraly 21-babyna sáıkes, biz qandaı-da bir nusqany aıta almaımyz, – dedi Qanat Taımerdenov.

Ol quqyq qorǵaý organdarynda buryn jumys istegen kólik júrgizýshisi Azamat Azamatovqa qatysty tergeý áreketteri barlyq normalardy saqtaı otyryp, júrgiziletinin jáne ol jaýapkershilikke tartylatynyn atap aıtty.

– Kólikti kim júrgizgeni mańyzdy emes. Ol burynǵy quqyq qorǵaý organdarynda jumys istegen nemese jumystan shyǵaryldy ma, onyń da mańyzy joq. Ol qylmys ekenin bilip turyp, mas kúıinde kólikke otyrdy. Sol úshin jaýap beredi, – dep atap aıtty Q. Taımerdenov.

Osylaısha departament basshysy áleýmettik jelilerde málimdemeler jasap, qaýeset taratpaýǵa jáne tergeýdiń resmı qorytyndysyn kútýdi surady.

Eske sala keteıik, blokbekette qaıtys bolǵan Dastan Ábdiqanovtyń anasy Janatgúl Ábdirova prezıdent Toqaevtan ulynyń ólimine qatysty tergeýdi qatań qadaǵalaýdy suraǵan bolatyn.