Búgin qala ákiminiń orynbasary Baqtıar Mákenniń tóraǵalyǵymen TJ eskertý jáne saldaryn joıý boıynsha komısıanyń otyrysy ótip, onda koronavırýs jaǵdaıy men karantın rejımin saqtaý máselesi qaraldy.

Komısıa otyrysy barysynda qalanyń iri saýda, oıyn-saýyq jáne fıtnes ortalyqtary basshylarynyń qatysýymen beınekonferensıa ótti.

Kásipkerler óz qyzmetin qaıta bastaýǵa baılanysty suraqtar qoıdy. Nur-Sultan qalasynyń ınvestısıalar jáne kásipkerlikti damytý basqarmasynyń bastyǵy Erlan Bekmýrzaev beınekonferensıa barysynda jumysyn qaıta bastaǵanyna qaramastan, kásipkerlik sýbektileri sanıtarlyq talaptardy qatań saqtaýǵa mindetti ekenin eske saldy.

Óz kezeginde elordalyq taýarlar men kórsetiletin qyzmetterdiń sapasy men qaýipsizdigin baqylaý departamenti bastyǵynyń orynbasary Aıgúl Shaǵaltaeva saýda jáne oıyn-saýyq ortalyqtary basshylarynyń qyzmetin qaıta bastaý múmkindigi týraly suraqtaryna jaýap berdi. Ár kásipkerge jeke jaýap berildi.

Ákimdiktiń mobıldi toby polısıa jáne epıdemıologtarmen birge sanıtarlyq normalardyń saqtalýy boıynsha kúndelikti reıd ótkizedi. Reıdtik is-sharalar barysynda monıtorıń toby 500 nysandy tekserdi. Koronavırýstyń taralýyn boldyrmaý úshin qatań erejeler qabyldandy.

Buǵan deıin 70-ten astam nysan sanıtarlyq normalarǵa saı kelmegeni úshin jabylǵan bolatyn.

Otyrysqa qatysqandar qazirgi ýaqytta qalada koronavırýs ınfeksıasynyń taralýyna jol bermeýge baǵyttalǵan sanıtarlyq-profılaktıkalyq sharalardyń jalǵasyp jatqanyn atap ótti.

Nur-Sultan ákiminiń orynbasary Baqtıar Máken azamattardyń qaýipsizdigin jáne sanıtarlyq-epıdemıologıalyq talaptardy qatań saqtaý qajetine nazar aýdardy. Sondaı-aq ol memlekettik organdarǵa kún saıyn nysandarǵa reıd júrgizip, sanıtarlyq normalardyń saqtalýyn tekserýdi tapsyrdy.

Eske sala keteıik, elordada maska taǵý rejımi saqtalady. Adam kóp jerlerde, avtobýstarda, dúkenderde jáne basqa qoǵamdyq oryndarda maska kıip, qashyqtyq saqtap, antıseptık qoldaný kerek. Qatań sanıtarlyq-epıdemıologıalyq talaptardy saqtamaǵan jaǵdaıda qala burynǵy qatań karantındik rejımge oralýǵa májbúr bolady.