«Nur Otan» partıasy Tóraǵasynyń birinshi orynbasary Baýyrjan Baıbek Facebook jelisindegi paraqshasynda partıaishilik tańdaý – praımerızdiń qashan ótetini týraly aıtty.

– Qurmetti dostar! Barshańyzdy elimizdiń Táýelsizdigin, san ǵasyrlyq tarıhy men egemendigin beıneleıtin Qazaqstan Respýblıkasynyń memlekettik rámizder kúnimen quttyqtaımyn.

«Nur Otan» partıasynyń Lıderi Nursultan Nazarbaev bıylǵy 17 tamyzdan 3 qazanǵa deıingi aralyqta partıaishilik tańdaý – praımerız ótkizý týraly Qaýlyǵa qol qoıdy. Bul – Elbasy jarıalaǵan «Nur Otan» partıasyn «qaıta jandandyrýdyń» mańyzdy bóligi bolyp tabylatyn partıaishilik demokratıanyń zamanaýı tetikteriniń biri.
⠀
Praımerızdiń negizgi maqsaty – aldaǵy Májilis pen barlyq deńgeıdegi máslıhattar saılaýlaryna partıalyq tizimderdi qalyptastyrý úshin básekeles kúres negizinde jańa kóshbasshylardy aıqyndaý.
⠀
Ózderińiz biletindeı, biz byltyr «Nur Otan»-nyń kadrlyq rezervine pılottyq rejımde irikteý ótkizgen bolatynbyz. Joba áleýmettik-ekonomıkalyq damýy, turǵyndarynyń sany jáne áleýmettik toptary boıynsha árkelki 14 qala men aýdanda ótkizildi. 10 myń partıalyqtan turatyn kadrlyq rezerv jasaqtaldy. Bizdiń qatarymyzǵa 20 myń adam qosyldy.
⠀
Halyqaralyq ozyq tájirıbelerdi jan-jaqty qarastyryp, partıa ishinde qyzý talqydan ótkizgennen keıin partıa Saıası keńesi músheleriniń daýys berýimen Praımerız ótkizý erejesi qabyldandy. Ol erteń bizdiń resmı saıtymyzda jarıalanatyn bolady.
⠀
Aldaǵy praımerızde qazirgi trendter eskerile otyryp, dástúrli daýys berýmen qatar onlaın-daýys berýdi de ótkizý josparlanyp jatyr, – dedi Baýyrjan Baıbek.
⠀
Onyń aıtýynsha, taıaý ýaqytta partıaishilik irikteýge qatysýǵa nıettengenderdi oqytý bastalady. Ol úshin Saıası menedjment mektebi komýnıkasıa, saılaýshylarmen jumys júrgizý, kópshilik aldynda sóz sóıleý daǵdylary jáne basqa da taqyryptar boıynsha onlaın-semınarlar uıymdastyrady.
⠀
– Partıamyzdyń Lıderi Nursultan Nazarbaev atap kórsetkendeı, «partıalyq tizimderge halyqtyń ártúrli bóliginiń ókilderi, bedeldi, azamattardyń senimine ıe bolǵan otandastarymyz kirýi tıis».
⠀
Áleýmettik partıalyq lıftti qamtamasyz etý – partıamyz úshin basty mindetterdiń biri. Sondyqtan partıa múshelerimen qatar qoǵam ómirine beı-jaı qaramaıtyn, daryndy da kreatıvti barsha qazaqstandyqty aldaǵy praımerızge belsendi qatysýǵa shaqyramyz, – dedi ol.