Meshit qyzmetkerleri men namaz oqýǵa kelgen jamaǵat mindetti túrde betperde kıýi tıis

Bul týraly qoǵamdyq komýnıkasıa ortalyǵynda ótken brıfıńte Mańǵystaý oblysy din isteri basqarmasynyń basshysy Maqsatbek Mahanbetov aıtty.

Búgingi kúni elimizdiń barlyq aýmaqtarynda epıdemıologıalyq jaǵdaı qatań baqylaýda, onyń ishinde Mańǵystaý oblysynda da karantın tártipteri erekshe baqylaýǵa alynǵan. Óńirde 25-mamyrdan bastap karantındik sharalar jeńildetilip, qulshylyq etý oryndary bar dinı birlestikter óz jumystaryn bastaǵan edi.
Osy ýaqyttan bastap qulshylyq etý oryndarǵa birqatar talaptar qoıylyp, tek jekelegen túrde namaz oqýǵa ruqsat etilgen. Meshitterde jamaǵat bolyp (bes ýaqyt namaz, juma namazy) namaz oqýǵa tyıym salynǵan bolatyn.
Endi osy qoıylǵan talaptardy kezeń-kezeńmen jeńildetý maqsatynda sanıtarlyq talaptardy saqtaı otyryp, meshitterde bes ýaqyt namaz oqýǵa osy jyldyń 6-maýsymnan bastap ruqsat berildi. (juma namaz oqylmaıdy)
Bul jóninde Qazaqstan musylmandar dinı basqarmasymen barlyq meshitterde atqarylatyn is-sharalar tártibi tómendegideı bolyp bekitildi.

Meshit qyzmetkerleri ár kisiniń qulshylyq jasaý ornyn 1,5 metrge saı etip belgilep qoıý;
Meshitke kelýshi jamaǵattyń paryz, súnnet jáne jekelegen namazdaryn oqý ara qashyqtyǵy 1,5 metr bolýy mindetti;
Meshitte ýaǵyz aıtylmaý;
Paryz namazdarynda qysqa súreler oqý nemese qysqa aıat oqý;
Namaz oqyp bolǵan soń, meshitten birden shyǵyp ketý;
Meshitke kelgen azamattar uzaq ýaqyt meshitte bolmaýy tıis. Meshitte bolý ýaqyt uzaqtyǵy – 15 mınýt;
Meshitte qol alyspaý;
QR Sanıtarlyq Bas dárigeriniń 22.05.2020 jylǵy №37 Qaýly talaptaryn oryndaý;
Meshitterdi jergilikti karantın talaptaryna sáıkes, meshitterdiń syıymdylyǵyn 30% asyrmaý;
Meshittiń ishi-syrtyna ár 10 metr saıyn qolǵa arnalǵan antıseptık quraldaryn qoıý;
Meshitterde aýa almasý júıesi jaqsy júrý úshin barlyq esikterdi ashyp qoıý;
Ár 3 saǵat saıyn namaz oqıtyn zaldarǵa zalalsyzdandyrý jumystaryn júrgizý;
-«Meshit qyzmetkerleri men namaz oqýǵa kelgen jamaǵat mindetti túrde betperde kıýi tıis. Jasy úlken kisiler, densaýlyǵy nashar adamdar /er jáne áıel/ jáne jas balalar namazdaryn óz úılerinde oqyǵandary abzal; Meshit dárethanalarynyń karantın ýaqyty aıaqtalǵanǵa deıin jabyq bolýyna oraı, namazǵa kelýshi jamaǵat úıden dáret alyp kelýleri tıis; Meshitke árkim óz jaınamazymen kelgenderi jón», - dedi Qazaqstan musylmandary dinı basqarmasy, Mańǵystaý oblysy boıynsha bas ımamy Ánýar Eljanov.