Saıası keńes Búrosynyń sheshimimen partıa kýratorlarynyń quramy jańartyldy, dep habarlady «Nur Otan» partıasy Ortalyq apparatynyń baspasóz qyzmeti.

«Nur Otan» partıasy tóraǵasynyń birinshi orynbasary Baýyrjan Baıbek atap ótkendeı, Elbasynyń bastamasymen partıanyń «qaıta jandanýy» aıasynda partıalyq kýratorlar arasynda úsh jylda bir ret josparly rotasıa júrgizý týraly sheshim qabyldanǵan bolatyn.

Osyǵan oraı Beıbit Mamraev partıa jelisinde bilim berý salasynyń kýratory boldy. Jumyspen qamtý jáne halyqtyń áleýmettik osal sektorlaryn qoldaý sektoryn Artýr Platonov qadaǵalaıtyn bolady. Al agrarlyq sektorge – Berik Ospanov. Partıanyń jetekshiligi arqyly jastardy qoldaý máselelerimen Gennadıı Shıpovskıı aınalysady.

«Barlyq úmitkerler - bizdiń fraksıanyń Májilistegi jumys tájirıbesi mol depýtattary. Men ásirese osy baǵytta úsh jyldan astam jemisti eńbek etken kýratorlarǵa alǵysymdy bildiremin. Ábdimanap Bekturǵanov «Muǵalim mártebesi týraly» zań jobasyn qaraǵan jumys tobyn basqardy. Jeksenbaı Dúısebaev elimizdiń aýyl sharýashylyǵy úshin mańyzdy «Jaıylymdar týraly» zań jobasyn usynyp, ony basqarady. Aıgúl Nurkına - ana men balany qorǵaý, ınklúzıvti bilim berý jáne turmystyq zorlyq-zombylyqpen kúresý týraly zań jobalarynyń bastamashysy. Ózi kýratorlyq etken qysqa merzimge qaramastan, Juldyz Omarbekova Azamattyq is júrgizý kodeksine ózgerister engizýge qatysty», - dedi Baýyrjan Baıbek.

Otyrys barysynda «Nur Otan» partıasy tóraǵasynyń birinshi orynbasary partıalyq qurylymdardyń formaty men jumys ádisterin ózgertý qajettiligine nazar aýdardy.

Onyń aıtýynsha, saılaýshylarmen neǵurlym belsendi jumys jasap, rezonans týdyrǵan máselelerge shuǵyl mán berip, ýákiletti organdardy tarta otyryp sheshim qabyldaý kerek. Bul formatta jańartylǵan partıalyq baqylaý komıteti, Sybaılas jemqorlyqqa qarsy is-qımyl jónindegi respýblıkalyq qoǵamdyq keńes, Otbasyn qoldaý, áıelder men balalar quqyǵyn qorǵaý jónindegi keńes jumys isteıdi.

«Partıa lıderi Nursultan Nazarbaevtyń «Nur Otan»-dy qaıta jandandyrý týraly tapsyrmalaryn oryndaý aıasynda búgingi tańda bizdiń qoǵamdyq keńesterimizdiń jumysy kúsheıtildi. Bıylǵy jyldyń birinshi toqsanynda Sybaılas jemqorlyqqa qarsy is-qımyl jónindegi respýblıkalyq qoǵamdyq keńes jáne Partıalyq baqylaý komıteti memlekettik baǵdarlamalar qatarynda «Bes áleýmettik bastama» jobasynyń iske asýyn, sondaı-aq sybaılas jemqorlyqqa qarsy is-qımyldardy qosqanda shamamen 2,5 myń máseleni qarady. Jalpy, partıalyq kýratorlardyń jumysy barynsha ashyq bolýy kerek. Árkimniń áleýmettik jelilerde óz akkaýnty bolýy kerek, óz jumysyn únemi jarıalap, adamdardyń suraqtaryna jaýap berýi kerek», - dep atap ótti Baýyrjan Baıbek.