Óńirlik komýnıkasıalar qyzmetiniń alańynda ótken onlaın-brıfıng barysynda Almaty qalasynyń Qoǵamdyq densaýlyq saqtaý basqarmasynyń basshysy Kamaljan Nadyrov azamattardyń koronavırýs ınfeksıasyn juqtyrýynyń aldyn alý boıynsha júrgizilip jatqan sharalar, osy ispen tikeleı aınalysatyn qyzmetterdiń pármendi jumystary, vırýs juqtyrǵan azamattarmen ótkiziletin sharalar týraly aıtty.

– Elimizde pandemıa jarıalanǵanǵa deıin COVID-19 enýi men taralýyn boldymraý úshin tıimdi sharalar qolǵa alyndy. Medısına qyzmetkerleri basqa elderden kelgen 200 myńnan astam azamatpen tıisti jumystar júrgizdi. Naýqastarmen 700-den astam úı jáne uıymdastyrylǵan oshaqtarda koronavırýs ınfeksıasyna qatysty sharalar júrgizildi, – dep eske saldy K. Nadyrov.

Kamaljan Nadyrov koronavırýs ınfeksıasynyń taralýymen kúresten bólek, qazir Qoǵamdyq densaýlyq saqtaý basqarmasynyń negizgi kúshi medısına qyzmetkerleriniń eńbek qaýipsizdigin qamtamasyz etýge jáne pasıentterdiń medısınalyq kómekti alý kezinde qaýipsiz túrde jetkizilýine baǵyttalǵanyn atap ótti.

Sonymen birge, medısınalyq uıymdarda ınfeksıalyq baqylaýǵa jiti nazar aýdarylǵan, osyǵan baılanysty, taıaý arada qaladaǵy barlyq stasıonarlarda bas dárigerdiń ınfeksıalyq baqylaý boıynsha orynbasary degen jańa qyzmet engiziledi.

Qoǵamdyq densaýlyq saqtaý basqarmasy sondaı-aq, medısınalyq kómek kórsetýdegi qoljetimdilik pen onyń sapasyn arttyrýda Almaty qalasynyń ákimi Baqytjan Saǵyntaev qoıǵan (júktegen) strategıalyq mindetterdi júzege asyrýda.

Osylaısha, Qalanyń densaýlyq saqtaý júıesin 2025 jylǵa deıin damytýdyń Keshendi jospary jasaldy. Oǵan qaladaǵy kadrlyq áleýetti odan ary damytý jáne analız, biliktilikti arttyrý jáne jańa tehnologıalardy engizý máseleleri enedi.

– Medısınalyq qyzmetti kórsetý, halyqtyń rızashylyǵyn kúsheıtý, turǵyndarmen komýnıkasıany jaqsartý boıynsha jumystar júrgiziledi. Endi Almatynyń árbir turǵyny men qonaǵy qaladaǵy densaýlyq saqtaý júıesindegi jaǵdaıdy jaqsartýǵa qatysty usynystary men shaǵymdaryn +77778888103 nómiri arqyly WhatsApp-qa joldaı alady, – dedi K. Nadyrov.

Sonymen birge, qalada koronavırýs ınfeksıasyna qatysty jaǵdaı turaqty aýrý deńgeıiniń ortasha ósimi – 2.3%. Sońǵy málimetter boıynsha, Almatyda koronavırýs ınfeksıasyn juqtyrǵandar sany 2882-ge jetken.