Qarjy mınıstri Erulan Jamaýbaev búdjet qarajatyn ýaqytyly ıgere almaı jatqan mınıstrlikter men ákimdikterdi atady.

"Memlekettik búdjet shyǵystary - 97,9%, respýblıkalyq - 98,9%, jergilikti búdjetter - 97,2% atqaryldy. Respýblıkalyq búdjettiń shyǵystary esepti kezeńde 5 trln 620 mlrd teńgeni qurady. Búdjet qarajaty 61 mlrd teńgege atqarylmady. Onyń 15 mlrd teńgesi únemdeý boldy. Igerilmegen soma - 46 mlrd teńge. Búdjet qarajatyn ýaqytyly ıgere almaı jatqan memlekettik organdar: Ulttyq ekonomıka mınıstrligi – 7,3 mlrd teńge, İshki ister mınıstrligi – 6,4 mlrd teńge, Densaýlyq saqtaý mınıstrligi – 4,8 mlrd teńge, Joǵarǵy Sot – 4,5 mlrd teńge, Qorǵanys mınıstrligi – 4,2 mlrd teńge", - dedi Erulan Jamaýbaev Úkimet otyrysynda.

Mınıstr qarjynyń ıgerilmeýiniń negizgi sebepteri - konkýrstyq rásimderdi uzaq jáne ýaqtyly ótkizbeý, naqty kórsetilgen qyzmetter, atqarylǵan jumys kólemine tóleý, sharttardy jasasý rásimderin uzaq júrgizý, tólem boıynsha qujattardy uzaqmerzimdi kelisý ekenin atap ótti.

"Jergilikti búdjetterdiń shyǵystary 2 trln 606 mlrd teńgeni qurady. 75 mlrd teńge oryndalmady. Óńirlerge 2 trln 317 mlrd teńge nysanaly transfert qarastyrylǵan. Aldyn ala derekter boıynsha, oǵan 671 mlrd teńge bólindi. Onyń 96% nemese 643 mlrd teńgesi ıgerildi. Oryndalmaǵan soma - 28 mlrd teńge. Onyń 8 mlrd teńgesi - búdjet qarajatyn únemdeý bolsa, al 20 mlrd teńge - ıgerilmedi", - dedi ol.

Bul rette eń kóp ıgerilmegen qarajat myna óńirlerde qalyptasqan: Almaty qalasy – 3,4 mlrd teńge, Batys Qazaqstan – 2,7 mlrd teńge, Pavlodar – 2,6 mlrd teńge, Qyzylorda – 2,4 mlrd teńge, Qaraǵandy – 2 mlrd teńge, Mańǵystaý – 1,6 mlrd teńge, Aqmola jáne Túrkistan oblystarynda – 0,9 mlrd teńgeden, Nur-Sultan qalasy jáne Almaty oblysynda – 0,8 mlrd teńge.