"Birde-bir gektar jer berilmeıdi". QR Ekologıa, geologıa jáne tabıǵı resýrstar vıse-mınıstri Erlan Nysanbaev İle-Alataýy ulttyq parkine qatysty ótken kezdesýde osylaı málimdedi.

Almaty qalasynda Ekologıa mınıstrligi, qoǵam ókilderi jáne zańger Baqytjan Bazarbektiń qatysýymen ótken kezdesýde İle Alataýy ulttyq parkindegi jerine qatysty suraqtarǵa jaýap berildi.

Kezdesý Ekologıa vıse-mınıstri Erlan Nysanbaevtyń tarapynan zańger Baqytjan Bazarbekovtiń "Facebook"áleýmettik jelisindegi İle Alataýy ulttyq parkiniń jer máselesine qatysty suraqtaryna jaýap berý maqsatynda uıymdastyryldy. Kezdesýge Ekologıa mınıstrliginiń jaýapty ókilderi, ulttyq saıabaq basshylyǵy, jýrnalıs Vadım Boreıko, belgili qoǵam ókilderi Muhtar Taıjan, Murat Ábenov, Toǵjan Qojalıeva men BAQ ókilderi qatysty.

Erlan Nuralıuly mınıstrlik ashyq dıalogqa árkez daıyn ekendigin aıtyp, qajetti sarapshylardy da shaqyra otyryp, barlyq saýalǵa jaýap berdi. Sondaı-aq, barlyǵy zań aıasynda júzege asyp jatqandyǵyn jetkizdi. Budan bólek, halyqtan eshteńeni de jasyrmaıtynyn baıandady.

Onyń aıtýynsha, ulttyq saıabaqtyń birde-bir gektary egin sharýashylyǵy men mal jaıylymyna berilmegen. Ulttyq parktegi jerdiń túp maqsaty ózgermegen. Ol memlekettiń jeke menshiginde.

– 16528 gektar jer bizde, memleket ıeliginde. Ol memleketten basqa eshkimge tıesili emes. Ol jerde eshqandaı qyzmet júrgizilmegen. Ol jer taýly aımaq, eshqandaı ınfraqurylym joq, ol jerde eshteńe salý múmkin emes, – dep atap ótti vıse-mınıstr.

– Jerdi jekeshelendirý týraly málimetter zańdy túrde ýaqytyly rásimdelmeýi bizdiń kiná emes, – dep atap  ótti vıse-mınıstr Erlan Nysanbaev.

– Buǵan bul bazany júrgizetinder jaýap bersin. Bul Ekologıa mınıstrliginiń quzyrettiligi men jaýapkershiligine kirmeıdi. Kez-kelgen jaǵdaıda bul jer eshqaıda ketpeıdi. Olar memlekettiń jekemenshiginde bolady, ol jerde eshqandaı qyzmet jasalmaıdy. Buǵan óz basymmen jaýap bere alamyn. Barlyq tarmaqshalar boıynsha zańdy túrde jaýap bere alamyn, – dedi mınıstrlik ókili.

Osy sózderiniń dáleli retinde ol kezdesýde zańgerge jáne qoǵam ókilderine tıisti qujattar men jerdiń kartasyn kórsetti. Sońynda eki tarap zańger Baqytjan Bazarbek Ekologıa mınıstrine usynatyn suraqtarǵa jaýap alý úshin taǵy bir kezdesý ótkizýge kelisti. Óz kezeginde Bazarbek myrza Erlan Nysanbaevtan jazbalardaǵy jaǵymsyz jaýaptar men emosıonaldyq ton úshin keshirim surady. Eki tarap syndarly dıalog barysynda pikirtalasty jalǵastyrýǵa nıetti ekendikterin jetkizdi.

İle Alataýy ulttyq parkindegi jer satylmaıtynyn jáne ózge eldiń azamattary men sheteldik kompanıalarǵa paıdalanýǵa berilmeıtinin Ekologıa, geologıa jáne tabıǵı resýrstar vıse-mınıstri Erlan Nysanbaev "Facebook" paraqshasynda da málim etti. Vıse-mınıstr İle Alataýy ulttyq parkinde ınfraqurylymdy damytýǵa qazaqstandyq ınvestor jaýapty ekenin, ondaǵy jer satylmaıtynyn atap ótti.

– Almaty jurtshylyǵy İle Alataýy ulttyq parkinde ekotýrızmdi damytýǵa qatysty másele kótergen edi. Atap ótsem, 2019-2025 jyldarǵa arnalǵan týrısik salany damytýdyń memlekettik baǵdarlamasy sheńberinde sheteldik, onyń ishinde AQSH-tyń tabysty tájirıbesi negizinde ulttyq parkti damytýdyń bas jospary jasaldy. Osyǵan oraı, óz moınyna ulttyq parktiń ınfraqurylymyn qorshaǵan ortaǵa zıan keltirmeı damytý mindetin alǵan jaýapty qazaqstandyq ınvestor anyqtaldy. Birden nazar salatyn jaıt, Ulttyq parktegi jerler satylmaıdy! Ózge eldiń azamattary men sheteldik kompanıalarǵa paıdalanýǵa berilmeıdi! Oǵan Qazaqstan Respýblıkasynyń zańy boıynsha tyıym salynǵan! 

– Ulttyq parkterdiń qazirgi jaǵdaıyn ózderińiz kórip otyrsyzdar: káýaphana, abajadaı meıramhanalar, sapasyz qyzmet, súreńsiz kórinister. Jaǵdaıdy túbirimen ózgertpeı bolmaıdy. Birinshi orynda adam men tabıǵattyń baılanysy turýy tıis. Tıisinshe, joldardy, kórý alańdaryn, ózen ústindegi kópirlerdi, tabıǵı úndestikti buzbaıtyn shaǵyn nysandardy salý kerek. Osynyń bárin jolǵa qoıatyn qazaqstandyq ınvestorǵa jalǵa nebári 35 ga jer ýchaskesi paıdalanýǵa berildi, – dep jazdy ol.

Vıse-mınıstr keltirgen málimetke súıensek, ınvestormen kezeń-kezeńmen 10 zamanaýı vızıt-ortalyq, 155 km-den astam jaıaý marshrýttar salady. Bul joba jańa jumys oryndaryn qurýǵa múmkindik beredi, kásipkerliktiń damýyn jáne týrızm salasyndaǵy joǵary bilikti kadrlardyń ósýin qamtamasyz etedi. Odan bólek, Erlan Nysanbaev ınvestor barlyq jumysty qorshaǵan ortaǵa zıan keltirmeı iske asyratynyn, al turǵyzylatyn qurylymdar zamanaýı ekologıalyq materıaldardan ázirlenetinin atap ótti.

Sóz sońynda basshy ulttyq park halyqqa árkez qoljetimdi bolatynyn, tipti Ulttyq park janynda Qoǵamdyq keńes qurylatynyn atap ótti.

– Aıta keterligi, ulttyq park burynǵydaı kez kelgen qazaqstandyq úshin qoljetimdi bolyp qala beredi. Eshqandaı qorshaýlar bolmaıdy. Osy apta boıy Almaty jurtshylyǵymen, belsendilermen, jýrnalısermen kezdestik. Halyqtyń barlyq talap-tilegi eskeriledi. Nátıjesinde Ulttyq park janynda Qoǵamdyq keńes quratyn bolyp sheshtik. Investordyń barlyq jumystardy sapaly túrde oryndaýyn biz halyqpen birge qadaǵalaıtyn bolamyz. Tabıǵatqa eshqandaı zalal kelmeıdi. Ol qatań túrde qadaǵalanady, – dep sózin túıindedi.