Almaty oblystyq sotynda 9 sýdıadan koronavırýs anyqtaldy. Bul týraly oblystyq sottyń tóraǵasy Elis Ábdiqadyrov aıtty.

– Ókinishke oraı, oblystyq sottyń toǵyz sýdıasynan COVID-19 anyqtaldy. Meniń áriptesterim dárigerlerdiń baqylaýynda, oqshaýlanýda. Vırýs taralmas úshin Almaty oblystyq sotynyń ǵımaraty karantınge jabyldy, oblystyq sottyń barlyq qyzmetkerleri jeti kúnge úı karantınine alyndy. Qyzmetkerlerdiń basym bóligi qashyqtan onlaın jumys istep jatyr, – dedi E. Ábdiqadyrov.

Onyń aıtýynsha, sottyń barlyq qyzmetkerleri 9 maýsymda koronavırýsqa test tapsyrǵan.

– Sot otyrystary qashyqtan qaralyp, sanıtarlyq-epıdemıologıalyq talaptar kúsheıtildi. Sot ǵımaratyna barýǵa tyıym salynady, barlyq hat-habarlar tek elektrondy túrde qabyldanady, – dep atap ótti sot tóraǵasy.

Eske sala keteıik, joǵarǵy sottyń baspasóz qyzmetiniń jetekshisi Aıdos Sádýaqasov koronavırýs ınfeksıasyn juqtyrǵandardyń arasynda sýdıalar da baryn jelide jarıalaǵan.