Shymkent garnızonynyń áskerı soty byltyr 24 maýsymda Arysta bolǵan jarylysqa qatysty qylmystyq isti qaraýdy bastady.

"Qylmystyq is boıynsha 16 adamǵa aıyp taǵyldy, 1473 adam zardap shekkender retinde tanyldy. Olardan bólek, sotqa sottalýshylardyń advokattary men prokýrorlar qatysady. Birinshi sot otyrysyna 204 qatysýshy keldi, onyń 16-sy sottalýshy, 19 advokat, 3 qoǵamdyq qorǵaýshy, 5 prokýror men 165 zardap shekken adam" delingen sottyń habarlamasynda.

Eske salaıyq, byltyr 24 maýsymda tańǵy ýaqytta Arys qalasynyń mańyndaǵy áskerı qoıma terıtorıasynda snarádtar jarylǵan. Keıin qala tolyqtaı evakýasıalanǵan edi. Tótenshe jaǵdaıdan úsh adam qaza taýyp, 200-den asa adam zardap shekken bolatyn.