Nazarbaeva senatqa qaıta kelýi ábden múmkin

"Álternatıv" zertteý ortalyǵynyń dırektory Andreı Chebotarevtiń aıtýynsha, Darıǵa Nazarbaeva óz kandıdatýrasyn usyna alady. Biraq ol úshin qolaıly aımaqty tańdaý qajet.

– Iá, Nazarbaeva ózine qolaıly aımaqtan kandıdatýrasyn usyna alady. Máselen, Almatydan, ıa bolmasa, balalyq shaǵy ótken Qaraǵandy oblysynan shyqsa bolady. Elorda da qolaıly jer. Jalpy, Nazarbaeva – óz kandıdatýrasyn anyq usyna alatyn adam, – deıdi Chebotarev.

Sarapshy kandıdatqa máslıhat depýtattarynyń daýys beretinin eske saldy. Al Nazarbaeva saılaýǵa qatyssa, árkim árqalaı oı túıýi múmkin.

– Bireýler onyń kandıdatýrasyn "Kitaphana" (Elbasy Nursultan Nazarbaevtyń rezıdensıasy) maquldap qoıdy dep oılap qalýy múmkin. Endi bireýler ony spıker qyzmetinen alyp tastaǵanyn eske túsiredi. Osyndaı jaǵdaıda sheshim qabyldaý qajet, – dep atap ótti Chebotarev. 

Nazarbaevanyń barlyq resýrsy bar

Saıasattanýshy Aıdos Sarym da Darıǵa Nazarbaeva saılaýǵa qatysa alady dep sanaıdy. Eks-spıker Nur Otan partıasynyń atynan, ıa bolmasa, jeke ózi saılaýǵa túsedi.

– Máslıhatta otyrǵan depýtattardyń basym bóligi – Nur Otan  ókilderi. Sol sebepti partıa osy kandıdattardy qoldaıyq dese, olar partıalyq tártipke baǵynady. Biraq aldaǵy saılaýdyń jóni bólek, oǵan kez kelgen adam qatysa alady. Ol úshin partıanyń ókili bolý mindet emes, – dep atap ótti Sarym.

Onyń aıtýynsha, kandıdat ózine senimdi ári tanymal bolsa, óz aımaǵynda qajetti daýystyń kólemin jınaı alady. Árıne, ol úshin qarjy jáne uıymdastyrý resýrstary bolýy qajet.

– Darıǵa Nazarbaeva jeke-dara óz kandıdatýrasyn usyna alady. Menińshe, onyń medıa, qarjy jáne taǵy basqa resýrstary jetkilikti, – deıdi Sarym.

Senatqa qaıta barýy ekitalaı

Al saıası sholýshy Ǵazız Ábishevtiń oıynsha, eks-senator otstavkadan keıin senat saılaýyna túspeıdi.

– Iá, zań boıynsha Darıǵa Nazarbaeva senat saılaýyna túse alady. Biraq ol óz kandıdatýrasyn usynady dep oılamaımyn. Ol senat spıkeri boldy. Odan keıin prezıdent jańa spıkerdi usyndy. Sol kezde Darıǵa Nazarbaeva eshqandaı málimdeme jasaǵan joq. Ol senatqa ótýdi josparlasa, prezdıenttik kvotamen qalatyn edi. Eger jeke ózi ótýdi oılasa, onda óz otstavkasyna qatysty pikir bildiretin edi, – dedi Ábishev.

Sarapshynyń aıtýynsha, saılaý kezinde jeńý úshin qol jınaý kerek. Odan keıin kandıdatýrany máslıhat depýtattarynyń qaraýyna usyný kerek. Darıǵa Nazarbaevanyń ondaı sharalarǵa barýy ekitalaı.

Senat depýtattaryn qalaı saılaıdy?

Senatqa árbir oblystan jáne respýblıkalyq mańyzy bar qaladan eki adam saılanady. Osylaısha, joǵary palataǵa 34 depýtat ótedi. Budan bólek, taǵy 15 senatordy prezıdent taǵaıyndaıdy.

Depýtattyq ókilettiliktiń merzimi – 6 jyl. Senatorlardyń jartysy úsh jyl saıyn qaıta saılanady.

Senat depýtattaryn qupıa daýys berý arqyly tańdaıdy. Saılaýshylar – máslıhat depýtattary.

Derekkóz: Sputnik Qazaqstan