QR Densaýlyq saqtaý mınıstri Eljan Birtanov koronavırýs ınfeksıasyn juqtyrdy. Ol bul týraly Facebook paraqshasynda jazdy.

– Dostar, ózderińizge jaǵymsyz jańalyq jetkizýime týra kelip otyr. Koronavırýske tapsyrǵan sońǵy testtiń nátıjesi nashar shyqty, menen de aýrý anyqtaldy. Ókinishke qaraı, mendegi sımptomsyz forma emes, sondyqtan juqpaly aýrýlar aýrýhanasynda jatyrmyn. Sanıtarlyq sharalardy qatań saqtaǵanyma qaramastan, bul indet meni de aınalyp ótpedi. Ásirese, qashyqtan, úıde otyryp jumys isteı almaıtyn qyzmetkerlerge qıyn. Sońǵy kúnderi birqatar óńirde, onyń ishinde kásipker, kásiporyn, medısına mamandary, memlekettik, BAQ qyzmetkerleri arasynan indet juqtyrǵandar qatary artýda. Qazaqstandaǵy jahandyq daǵdarys pen pandemıa saldarynan paıda bolǵan problemalardy sheshý úshin qazir kóptegen azamat qarqyndy jumys isteýde. Bizge jıi jeke kezdesýlerge barýǵa, aımaqtarǵa issaparǵa shyǵýǵa týra keledi, mundaı jaǵdaıda, árıne, COVID-19 juqtyrý qaýpi de joǵary, – dedi Birtanov.

Mınıstr qazaqstandyqtardy «jeke karantın» erejelerin qatań saqtaýǵa jáne aýrýdyń aldyn alý sharalaryna muqıat mán berýge shaqyrdy.

"❗TAǴY DA QAITALAIMYN:
1. Jumysta, kólikte, kóshede, dúkende jáne t.b. jerlerde múmkindiginshe araqashyqtyqty saqtańyz;
2. Eger siz ofıs qyzmetkeri bolsańyz, múmkindiginshe úıden jumys isteýge tyrysyńyz.
3. Týys, dostarmen onlaın, vıdeo-qońyraý jáne ózge de jańa tehnologıalardyń kómegimen baılanys ornatyńyz;
4. Qoǵamdyq oryndarda maska kıip júrińiz;
5. Qoldy kem degende 20 sekýn sabynmen jıi jýyp, sanıtaızermen súrtińiz;
6. Ózińizdiń jáne otbasy músheleriniń temperatýrasyn jıi ólshep turyńyz.

Eger boıyńyzdan mynadaı sımptomdardy baıqasańyz: álsizdik, basyńyz, tamaǵyńyz aýyrsa, dene qyzýyńyz kóterilse dereý dárigerge habarlasyńyz!

Abaı bolyńyzdar! Barshańyzǵa zor densaýlyq tileımin!", dep jazdy densaýlyq saqtaý mınıstri.