15 maýsymda keshki saǵat 20:00-den bastap Kókshetaý qalasyndaǵy 7 blokbekettiń jumysy qaıta jandanyp, qalada karantındik shekteý sharalary kúsheıtiledi. 

"14 maýsymdaǵy jaǵdaı boıynsha oblysta koronavırýs ınfeksıasyn juqtyrǵan 199 jaǵdaı tirkeldi, onyń 4-i qaıǵyly aıaqtaldy. Oblys ortalyǵynda jaǵdaı kúrdelene tústi. Monıtorıń tobynyń jumysy turǵyndardyń ózi men týystarynyń densaýlyǵyna nemquraıly qaraıtynyn kórsetti. Jappaı otbasylyq sharalar – týǵan kún, úılený toıy, kisiniń jylyn berý, jerleý rásimderi tárizdi sharalardyń ótkiziletinin kórsetti. Sanıtarlyq epıdemıologıalyq talaptardy oryndamaıtyn kásiporyndar da bar. Barlyq jaǵdaı boıynsha ákimshilik sharalar qoldanylýda" delingen habarlamada.

Sońǵy aptada qalada vırýs juqtyrǵandar 42 adamdy qurady. Onyń ishinde aýrý belgisi barlar – 15, aýrý belgisi bilinbeıtinder – 27.

Eske sala keteıik, sımptomy joqtarda aýrýdyń jótelý, dene qyzýynyń kóterilýi syndy ózge de belgileri bilinbeıdi. Alaıda zertteý qorytyndysy oń nátıje kórsetip jatyr.