Qazaqstan densaýlyq saqtaý mınıstrliginiń resmı ókili Dıas Ahmetshárip "Qazaqstan" telearnasyndaǵy "Ashyq alań" baǵdarlamasynda "koronavırýs joq" deıtin azamattardy synǵa aldy.
"Halyq senbesin. Senbeńizder! Vırýs joq. Erteń sizderge oryn da qalmaıdy, sodan soń sizderdi jerleımiz. Ashyq aıtqanda jaǵdaı osyndaı. Biz sizderdi jerleımiz! Men resmı ókil retinde aıtarym, vırýsqa senbeńizder. Munyń bári oıdan shyǵarylǵan. Qazir mamandar da aýrýhanalarda oryn joq ekenin aıtty ǵoı. Aldaǵy ýaqytta oryn qalmaıdy. Al sizder aýyrasyzdar, sosyn kóz jumasyzdar. Boldy" dedi Dıas Ahmetshárip.
Áleýmettik jelide Dıas Ahmetsháriptiń baǵdarlamada aıtqanyn "qyzmettik etıkaǵa jat" dep synap jatqandar da bar.
"Densaýlyq saqtaý mınıstrliginiń resmı ókili Dıas Ahmetsháriptiń sarkazmmen aıtqan "Senbeseńizder, vırýs joq. Sizderge oryn jetpeıdi. Sosyn biz sizderdi jerleımiz" degen frazasyn estip oılandym.
Jaraıdy, eger aqparattandyrý jumysyn tikeleı efırde júrgizýge biliktiligi jetispese, salyq tóleýshiler esebinen jalaqysyn alyp otyryp adammen adam qusap sóıleýge adamdyǵy jetpese, onda memlekettik qyzmetkerlerdiń etıkasy týraly erejesi bar ǵoı desem...
Qazaqstan Respýblıkasy prezıdentiniń 2000 jylǵy 21 qańtardaǵy N 328 Jarlyǵymen bekitilgen Qazaqstan Respýblıkasy Memlekettik qyzmetshileriniń qyzmet etıkasy erejeleri kúshin joıypty" dep jazdy belsendi Bella Orynbetova óziniń facebook paraqshasyna.
