Almatyda qala turǵyndaryn megapolıstiń ár aýmaǵyndaǵy aýa sapasy týraly habardar etetin joba iske qosyldy. Bul týraly qala ákimdiginiń baspasóz qyzmeti habarlady.

Almaty ákimi Baqytjan Saǵyntaev óziniń Twitter-degi paraqshasynda qalalyqtardyń qorshaǵan ortanyń jaǵdaıy, sonyń ishinde aýaǵa qatysty habardar bolý deńgeıin arttyrý úshin ekologıalyq jobanyń iske qosylǵany týraly jazdy.

– Atmosferalyq aýanyń sapasyn LED ekranda kórsetemiz. Qalanyń ár bóliginde ornalasqan dachıkterdegi aqparatty Qazgıdromet jańartyp, óńdeıdi. Bul joba almatylyqtardyń qalanyń ekologıalyq ahýalyn bilip otyrýyna múmkindik beredi, – dep habarlady B. Saǵyntaev.

Aqparat 26 dachıkter arqyly jaqyn mańdaǵy LED-ekranǵa túsedi. Mundaǵy málimetter bir kúnde úsh ret jańarady. Qosymsha taǵy 10 monıtorıńtik stansıa qosylatyn bolady.

Málimetter aýanyń negizgi alty kórsetkishinen turady. Olar: RM 2,5 ólshengen bólikteri, kúkirttiń dıkosıdi, azottyń dıkosıdi, azottyń oksıdi, kómirteginiń oksıdi, fenol.

Bul joba Almaty ákimi B. Saǵyntaevtyń tapsyrmasyna sáıkes júzege asyp otyr jáne qalanyń ekologıalyq ahýalyn jaqsartýdyń keshendi sharalarynyń biri.

Eske salsaq, ekologıalyq aqparatqa qoljetimdilik quqyǵy Qazaqstan Respýblıkasynyń Ekologıalyq kodeksinde aıtylǵan.