Alekseı Soı densaýlyq saqtaý birinshi vıse-mınıstri bolyp taǵaıyndaldy. Bul týraly premer-mınıstriniń resmı saıty habarlady.

Úkimet basshysy Soıdyń medısına jáne basqarý salasyndaǵy úlken jumys tájirıbesin atap ótti. Ol mınıstr Eljan Birtanov emdelip shyqqansha densaýlyq saqtaý mınıstriniń mindetin atqarady.

Asqar Mamın koronavırýs pandemıasymen kúres jaǵdaıynda halyq densaýlyǵyn saqtaý boıynsha densaýlyq saqtaý júıesiniń aldynda turǵan mindetterdi sheshýdiń mańyzdylyǵyn atap ótti.

Alekseı Vladımırovıch Soı 1977 jyly 2 sáýirde Ońtústik Qazaqstan oblysynda dúnıege kelgen. Sells College (London), Qazaqstan memlekettik medısına akademıasynyń aspırantýrasyn, Ońtústik Qazaqstan memlekettik medısına akademıasyn, «Dáneker» halyqaralyq quqyq jáne halyqaralyq bıznes ınstıtýtyn, RF Prezıdenti janyndaǵy Reseı halyq sharýashylyǵy jáne memlekettik qyzmet akademıasynyń korporatıvtik basqarý joǵary mektebin támámdaǵan.

Stenford ýnıversıtetinde (AQSH), Sıngapýrda, Máskeýde, Germanıada, Ulybrıtanıada jáne t. b. elderde taǵylymdamadan ótken. İskerlik ákimshilik doktory, medısına ǵylymdarynyń kandıdaty.

Hırýrg-endoskopıst bolyp jumys istegen, qalpyna keltirý hırýrgıasy jáne transplantologıa ortalyǵynyń aǵa ǵylymı qyzmetkeri, ulttyq ǵylymı medısına ortalyǵynyń ishki medısına ortalyǵynyń jetekshi ǵylymı qyzmetkeri, «Eýroazıattyq respıratorlyq qoǵam» qoǵamdyq birlestiginiń bas hatshysy, QR prezıdenti is basqarmasynyń zamanaýı medısınalyq tehnologıalardy engizý ortalyǵynyń dırektory, QR prezıdenti İs basqarmasynyń medısınalyq ortalyǵynyń basshysy, Astana qalasynyń №1 qalalyq aýrýhanasynyń bas dárigeri, QR densaýlyq saqtaý jáne áleýmettik damý vıse-mınıstri, QR densaýlyq saqtaý vıse-mınıstri qyzmetterin atqarǵan. 

2019 jylǵy aqpannan bastap osy ýaqytqa deıin Qazaqstan Respýblıkasy Prezıdenti İs basqarmasynyń Medısınalyq ortalyǵyn basqardy.