... Sońǵy aptalar, shyndyǵynda, tym aptap boldy...

Ásirese, Ońtústik Qazaqstan men Almaty qalasy úshin...

Qazaqtyń áıdik eki aımaǵy basshy­la­rynan aıyryldy. Ońtústiktiń

jur­tyna aqyl toqtatyp, ómir kór­gen óristi azamat buıyrsa,  almaty­lyqtarǵa, tipti, kishkentaı aýyldy da basqaryp kórmegen kókózek jigit keldi. Biraq, «kúshtiniń arty dıirmen tartyp», «Bolashaq» baǵdarlamasynyń tuńǵysh túlegin Elbasynyń ózi jetektep ákelip, Almatynyń azýly zıalysyna tanystyrdy. Qaıtsin endi, klastastyń balasy – óz balańdaı ystyq qoı...

Túrinen Almatydan ǵana emes, adamzattan túńilgen keıip kórinetin Ahmetjan ESİMOV elimizdiń eń iri sha­harynda 460 myń kásipkerlik ny­sandarynyń turaqty jumys isteı­tin­digin, Elbasynyń Almatyny «qazaq ekonomıkasynyń lokomotıvi» dep ata­ǵanyn bıylǵy jyldyń alǵashqy jartysynda isker qalanyń respýblıka  búdjetiniń 3/1 bóligin jınap úlgergen basty qan quıýshy (donor) ek­endigin; Qazaqstannyń shıkizat ónim­derine álemdik baǵanyń áser ete almaıtyn ári shaǵyn jáne or­ta kásipkerlikti negizge alǵan «bas­qa ekonomıka» qurýǵa tyrysyp jatqandyǵyn; tipti, osynaý mań­yz­dy tájirıbe úshin Almaty qala­sy­nyń tańdalyp alynǵandyǵyn; ke­rek deseńiz, búgingideı munaı men metaldardyń álemdik quny qul­dy­ra­ǵanda Almatynyń dáp osy artyq­shy­lyǵy men aıyrmashylyǵy el eko­nomıkasynyń «júrek qaǵysyn» qal­ypty ustap turǵandyǵyn; qazaqtyń keń­baıtaq dalasynda kásipkerliktiń damýyna Almatydan artyq qolaıly jerdiń joq jáne Almatynyń toq­taý­syz damýǵa tıis ekendigin salqyn sabyr, kemel senimmen áńgimelep berdi.

Biz sendik. Sabyr men kemeldikke sendik. Ahmetjan Smaǵululynyń moı­yn­yndaǵy jaýapkershilik jeńildegen joq, kerisinshe, aýyr tarta tústi. As­tana qalasynyń ákimi Ádilbek Jaq­sy­bekov óz laýazymy men «Astana EKSPO-2017» halyqaralyq kórmesi Ulttyq kompanıasynyń basshylyǵyn qatar kótere almas edi. Bizdiń «ol­ım­pıadalyq armanymyzdy» Beıjiń urlap ketken soń, adamzat aldyndaǵy abyroıymyz – «Astana EKSPO-2017» halyqaralyq kórmesi bolyp qaldy. Ahmetjan aǵamyz aýylsharýashylyq agronomy bolsa da, qazaqtyń bedeli úsh­in jańa tehnologıamen «dosta­syp», adamzattyń múldem tyń kúsh-qýatynyń túrlerin tabýǵa týra keledi... Eń bastysy, qazaqtyń aby­roıyn saqtaýǵa bólingen qyrýar qar­jylar bedelimizdi bes tıyn qylyp, talan-tarajǵa túspesin. Esimov esi joq essiz de, baýyrlyǵy joq bóten de, aǵaıyndyǵy joq alys ta adam emes, eserlik kórsetpeıtin shyǵar?!.

...Eń qıyny, tamyzdyń jeksenbi­siniń tamyljyǵan túni Almatynyń alyp qorjynyn birge bólisip, maıyn iship, jiligin shaqqan jýanqaryndar úshin aspannan túsken naızaǵaıdaı boldy. Qoıdyń basyn mújip, mıyn birge jegen etekjeńdi Ahmetjannyń ornyna, nemisten sý únemdeýdi úırengen úrpekbas kele qaldy. Elbasynyń «Almaty - jastar men stýdentterdiń qalasy bolǵandyqtan, jas adam keldi» degenge meńzegen sózi de eshkimdi ılandyra almady...

Elimizdiń eń belsendi ekonomıkalyq ortalyǵy dúr silkindi...

Baýyrjan BÁIBEK - alaqandaı aýyldy da jeke basqarmaǵan, sharýa­shylyq tájirıbesi múldem joq, iri qalaǵa basshylyqqa taǵaıyndalǵan tuńǵysh «bolashaq» baǵdarlamasynyń ókili jáne sovettik basqarý satylaryn kórmegen birinshi ákim.

Baýyrjan Báıbektiń shyqqan bıigi orynbasarlyqtan asqan joq: Prezıdent Ákimshiligi jetekshisiniń orynbasary jáne «Nur Otan» partıasy basshysynyń birinshi orynbasary.

Jergilikti bılikke qaǵazben nus­qaý taratý men aımaqtyń kúlli sharýa­shylyǵyn naqty basqarýdyń nemese ınternet-joba jetekshisi bolý men asa iri qurylys alańyn basqarýdyń arasy jer men kókteı!..

Degenmen, Elbasy: «Búgingi jaǵ­daı­da Almatyny basqarýǵa tájirıbeli de kreatıvti kadrler kerek» dep qaldy. Baýyrjan Báıbektiń «táji­rıbesi» belgili, al, kreatıv degen ne?

Kreatıvti bolý degenimiz – (create - aǵylshyn sózi - jasap shyǵarý týdyrý) naqty jaǵdaıda buryn qoldanyl­maǵan tyń tásilder men ádisterdi qoldaný arqyly qıyndyqtan shyǵýdyń nemese maqsatqa jetýdiń múldem jańa joldary. Jeke adamnyń bilimi men jigerin paıdalanyp, dástúrli ádet-ǵuryptan múldem bólek, jańasha oı-sanasymen táýelsiz tásilder qol­danýdyń nátıjesinde batyl sheshim qabyldaýy. Amerıkandyq psıholog Abraham Masloý: «Kreatıv  - árbir adamda bolǵanymen, ósken ortasyna, tálim-tárbıesi men bilim-biligine qaraı kóbine joǵalyp ketetin shyǵarmashylyq ynta men baǵyt» deıdi...

Almaty - qatardaǵy qarapaıym qala emes, alyp megapolıs. Almatydaı «ór keýdeli, nar bolmysty» qalaǵa ynta men baǵyt azdyq etedi, tipti, muny qaýipti qadam desek te artyq emes...

Bálkim, Baýyrjan Baıbek - pil men túıeniń teketiresiniń «jemisi» shyǵar, biraq, ómir-ormanynda asa qaýipti jyrt­qyshtardyń júrgendigin umytpaý kerek...

Atamyz qazaq: «Maı surasań - mine, quıryq» degen eken.

As bolsyn!..

Qajymuqan ǴABDOLLA