Jambyl oblysynyń ákimi Berdibek Saparbaevtyń tóraǵalyǵymen ótken Jambyl oblysy jedel shtabynyń kezekti otyrysynda taıaý ýaqytta shekteý sharalaryn kúsheıtý týraly sheshim qabyldandy. Shekteý sharalaryn kúsheıtý týraly sheshim koronavırýspen aýyrǵan naýqastar sanynyń ósýine baılanysty bolyp otyr, dep jazady coronavirus2020.kz.

Basqosýda taýarlar men qyzmetterdiń sapasyn baqylaý departamentiniń basshysy Berik Jarqynbekov baıandama jasady.

– Ókinishke oraı, statısıka kóńil kónshitpeıdi. Eger 15-21 maýsym aralyǵynda óńirde 317 jaǵdaı anyqtalsa, 22-28 maýsym aralyǵynda ol – 473-ti quraǵan. Onyń 60 paıyzy Taraz qalasynda tirkelgen, – dedi Berik Jarqynbekov. Sondaı-aq, onyń aıtýynsha, kórsetkishtiń nasharlaýyna karantındik sharalardy jeńildetý jáne epıdemıaǵa qarsy sharalar algorıtmderiniń saqtalmaýy áser etken.

Departament basshysy barlyq eńbek ujymdarynyń kireberisterinde qyzmetkerlerdiń dene temperatýrasyn ólsheýdi, aýrý belgileri bar qyzmetkerlerdi jumysqa jibermeýdi, sanıtarıalyq-epıdemıologıalyq talaptardy saqtaýǵa jaýapty adamdy aıqyndaýdy, jumys kúni ishinde qolǵaptar men maskalardy paıdalanýdy, bir bólmede keminde bir metr qashyqtyqty saqtaýdy, qyzmetkerlerdi jumysqa jáne jumystan úıge qyzmettik avtokólikpen ortalyqtandyrylǵan jetkizýdi qamtamasyz etýdi usyndy.

Basqosý sońynda Berdibek Saparbaev jambyldyqtardy sanıtarlyq dárigerlerdiń usynystaryn ustanýǵa shaqyryp, úndeý joldady.