Koronavırýs ınfeksıasy men jedel respıratorlyq aýrýlardyń taralýyn eskertý, halyqtyń qaýipsizdigin qamtamasyz etý maqsatynda Almaty qalasynyń bas memlekettik sanıtar dárigeriniń qaýlysyna sáıkes karantın kezinde farmasevtıkalyq qyzmetti júzege asyrý aıasynda qalanyń dárihana uıymdaryn dári-dárimekpen qamtamasyz etý máseleleri boıynsha monıtorıńtik top qurylady.

Atalǵan toptardy Almaty qalasynyń Taýarlar men qyzmetterdiń sapasy men qaýipsizdigin baqylaý departamenti men Almaty qalasynyń jáne oblysynyń Kásipkerlik jáne ınvestısıalar basqarmasymen, sonymen birge, QR farmasevtıka qyzmetin qoldaý jáne damytý qaýymdastyǵymen birlesip qurmaq.

Monıtorıńtik toptar qaladaǵy dárihanalardy kún saıyn aralaıtyn bolady. Monıtorıń barysynda saýdadaǵy dárilik quraldardyń 41 ataýyna erekshe kóńil bólinbek, sonyń ishinde naqty myna preparattar: «Trombopol», «Kardıomagnıl», «Aspırın», «Trombo ass», «Aspırın-Kardıo», «Ksarelto 15», «Azıtro 500», «Azıtroks 500», «Azıtromısın 500», «Azısın 500», «Zaha 500», «Zıtmak 500», «Zıtroks 500», «Sýmamed 500», «Amoksıklab», «Aýgmentın», «Amoksıklav», «Klavam», «Flemoklav Solútab», «Sefıksım», «Sefım», «Sýpraks solútab», «Sýpraks 24», «Toksım-O», «Tamıflú», «Oseltamıvır», «Inflúseın», «Flývır», «Nomıdes», «Ingavırın 90», «Ergoferon», «Kagosel», «Arpeflú», «Parasetamol», «Efferalgan», «Panadol», «Nýrafen», «Ibýprofen», «Novıgan», «Mıg 400», «Nımesýlıd».

Sonymen birge, birqatar dárihana uıymdary kún saıyn belgilengen tizimge sáıkes, dárilik quraldardyń bar-joǵy jaıly aqparat berip otyrady.

Osylaısha, atalǵan sharalar halyqty medıkamenttermen úzdiksiz qamtýǵa jáne úıde emdeletin naýqastarǵa jaǵdaı jasaýǵa múmkindik beredi. Sonymen birge, dárilik preparattardyń baǵasyn qadaǵalaý maqsatynda dárihana uıymdarynyń basshylaryna Densaýlyq saqtaý mınıstrliginiń 2019 jyldyń 15 shildedegi «Dárilik quraldyń bólshek jine kóterme saýdada satylatyn ataýynyń shekti baǵalaryn bekitý týraly»№ QR DSM-104 buıryǵyna sáıkes bólshek saýdada shekti baǵany saqtaý qajettigi qatań eskertiledi.