Túrkistan oblysy Keles aýdanynyń Abaı atyndaǵy aýrýhananyń hırýrgi áleýmettik jelide qoldanýǵa jaramsyz medısınalyq qolǵaptardy túsirip salǵany úshin jumystan qýyldy.

33 jastaǵy Qaırat Seıýalıev vıdeoda naýqas pen qyzmetkerlerdiń qaýipsizdigin qamtamasyz etetin zattardyń barlyǵy kıetin kezde jyrtylyp qala beretinin aıtqan. Dáriger bul vıdeonyń aldynda aýrýhanaǵa ákimshiligine barǵanymen, sonda da sapaly qolǵap ala almaı, nátıje bolmaǵanyn aıtady. Keıinnen áleýmettik jelide vıdeo qyzý talqylanyp, hırýrgtyń jumystan shyqqany belgili boldy.

Hırýrg aýrýhanaǵa 8 jyl buryn "Dıplommen aýylǵa" baǵdarlamasy arqyly jumysqa turǵan. 7 jyl boıy hırýrgıa bóliminiń meńgerýshisi bolyp, qyzmet atqaryp kelgen. Alaıda 2020 jyldyń aqpan aıynda aýrýhanaǵa jańa basshylyq kelip, mamandardyń esh negizsiz jumystan bosatylýy bastalǵan.

– Sapasy óte tómen qolǵaptardy kórsetkenim úshin ákimshilik, bas dáriger, onyń orynbasarlary, kadr bóliminiń basshysy, zańger, aýrýhana kásipodaǵynyń tóraǵasy syndy 10 adam meniń atyma hattama toltyrǵan. Keıin 3 mınýttan soń jumystan qýylǵanym týraly qaǵaz keldi. Munda men ákimshilikten joq nárseni ne materıaldyq kómek suraǵanym joq, tek pandemıa kezinde bizdi qorǵaı alatyn qolǵaptar berýin suradym. Ádildik qaıda?!, – dedi Qaırat Seıdýalıev. 

Aýrýhananyń bas dárigeri hırýrgty jumystan bosatý úshin birneshe sebep baryn aıtty.

– Aýrýhanada qolǵap mólsher boıynsha beriledi jáne ol muny jaqsy biledi. Aǵa medbıkege júginýdiń ornyna vıdeo túsirip, ony jarıalady. 30 maýsymda ol ekinshi vıdeony jarıalady. Sonymen qatar, Qaırat Seıdýalıev aqpan aıynda tártiptik jazaǵa tartylyp,  sógis alǵan. 30 naýryzda naýqasqa úsh saǵat ishinde eshqandaı kómek kórsetpegeni úshin de shaǵym tústi, – dedi Keles aýdandyq aýrýhananyń bas dárigeri Aıda Beksultanova.

Hırýrg komısıa sheshimimen kelispeıtinin aıtyp, oblystyq densaýlyq saqtaý basqarmasy men aýrýhana ákimshiligi jumystan zańsyz bosatyp, jala japqany úshin Prezıdentke hat joldamaq.