«Nur Otan» partıasynyń Ortalyq apparatynda Memleket basshysy Qasym-Jomart Toqaev taǵaıyndaǵan «Halyq alǵysy» arnaıy medalimen «Biz Birgemiz» jalpy respýblıkalyq aksıasynyń eń belsendi volonterlary marapattaldy. Budan buryn 3 myńnan astam jas qazaqstandyq partıa Lıderi Nursultan Nazarbaev qol qoıǵan alǵys hattarǵa ıe bolǵan edi.

Saltanatty shara barysynda «Nur Otan» partıasy Tóraǵasynyń Birinshi orynbasary Baýyrjan Baıbek sońǵy birneshe aıda Nursultan Nazarbaevtyń bastamasy boıynsha qurylǵan «Birgemiz» qory Elbasynyń tapsyrmasymen 550 myńnan astam asa muqtaj otbasy tikeleı qarjylyq kómekpen qamtylǵanyn atap ótti. 5 mıllıonnan astam tegin maska taratyldy. «Nur Otan» partıasy men Tuńǵysh Prezıdent Qory jelisi boıynsha 300 myńdaı otbasy azyq-túlik sebetteri men birinshi kezekte qajetti taýarlardy aldy. Onyń aıtýynsha, osynaý aýqymdy jumysty volonterlardyń kómeginsiz atqarý múmkin emes edi.

«Búgin maǵan Memleket basshysy Qasym-Jomart Kemeluly Toqaevtyń atynan Sizderge «Halyq alǵysy» arnaıy medalin tapsyrý abyroıly mindeti buıyryp otyr. Sizder birneshe aı boıy óz ómirlerińiz ben densaýlyqtaryńyzǵa tónetin qaýipke qaramastan, muqtaj qazaqstandyqtarǵa barynsha kómek kórsettińizder. Túrkistan oblysynyń Maqtaaral aýdanyndaǵy sý basqan aýyl turǵyndaryna da kómek berýge alǵashqylardyń biri bolyp attandyńyzdar. Azamattyq belsendilikterińiz ben aq nıetterińiz úshin sizderge alǵys aıtamyn. Sizderdiń kópshiligińiz partıaishilik irikteý – praımerızge de qyzý qatysatyndyqtaryńyzǵa senimdimin», - dedi ol.

Volonterlarǵa Memleket basshysynyń atynan taǵaıyndalǵan medaldarmen birge Tuńǵysh Prezıdent – Elbasy Nursultan Nazarbaevtyń qoly men sýreti beınelengen fýtbolkalar da berildi.