Qala ákimi Baqytjan Saǵyntaev turǵyn úılerdi, áleýmettik jáne óndiristik nysandardy paıdalanýǵa berýdiń aralyq qorytyndylary týraly aıtyp berdi.

Shahar basshysy B. Saǵyntaev óziniń Instagram-daǵy jeke paraqshasynda karantındik sharalarǵa qaramastan qurylys salasy joǵary qarqyndy saqtap qalǵanyn jazdy.

«İske qosylǵan nysandar boıynsha aralyq qorytyndy shyǵaryldy. Álbette, karantın qalypty ómirimizge ózgerister engizdi. Dese de, Astana kúnine daıyndyǵymyz jaman emes», — dep atap ótti B. Saǵyntaev.

Qala ákimi Elbasynyń jáne Memleket basshysynyń Almaty qalasyn damytý jónindegi tapsyrmalaryna sáıkes áleýmettik nysandar men turǵyn úıge erekshe nazar aýdarylǵanyn tilge tıek etti.

Bul kúnderi 4 mektep, 2 balabaqsha, 2 mýzykalyq mektep, 100 kelýshige arnalǵan jáne 40 tósek-orny bar medısınalyq ortalyq paıdalanýǵa beriledi. Qurylysshylar alty turǵyn úı kesheninen 179 myń sharshy metr turǵyn úıdi, bul degenimiz — 1,5 myń páterdi ótkizýge daıyn. Bıznes salasy birqatar komersıalyq jobalardy júzege asyrmaq. Olar pandemıa eńserilgennen keıin tolyq qýatymen jumys isteıtin jańa óndiristerdi iske qosady. Bul nysandarda 3200 jańa jumys orny ashylady.

«Belgilengen josparlardy iske asyrý bolashaqqa jańa serpinmen optımısik turǵyda qaraýǵa múmkindik beredi. Búginde biz osynaý qıyn kezeńnen bıznesti aman alyp qalý úshin barlyq qoldaý sharalaryna júginýdemiz. Birlese qala ekonomıkasynyń múddesine nuqsan keltirmeı jáne qatań karantındik sharalardy saqtaı otyryp, ómir súrýdi jáne jumys isteýdi úırenemiz dep senemin», — dep túıindedi sózin B. Saǵyntaev.