Densaýlyq saqtaý mınıstri Alekseı Soı prezıdenttiń atyna joldaǵan vıdeosy áleýmettik jelide birshama rezonans týdyrǵan shymkenttik reabılıtolog Aına Bakeevamen sóıleskenin aıtty, dep habarlady QazAqparat.

– Em-domnyń kúrdeli ádisi boıynsha ótinim jasaǵan dáriger Aına Bakeevanyń habarlamasyna qatysty birshama suraq kelip tústi. Búgin onymen baılanysqa shyǵyp, 40 mınýttaı sóılestim. Negizgi problemany, dárigerdiń neni jetkizgisi kelgenin túsindim. Ol áleýmettik jelilerde, tipti medısına qyzmetkerleriniń aıtýy boıynsha da em-domnyń túr-túri tarap ketkenine alańdaýshylyq bildirip jatyr. Em-dom túrlerin áleýmettik jelilerde kórip alǵan adamdardyń da oıy san-saqqa ketedi. Al keıbir preparattar kerisinshe, densaýlyqty nasharlatady. Suraqtarǵa jaýap tapqysy keletin myńdaǵan adam Aına Bakeevaǵa júginedi eken, – dedi Alekseı Soı búgin OKQ-da ótken baspasóz máslıhatynda.

Osy oraıda ol Densaýlyq saqtaý mınıstrligi halyqqa arnalǵan keńesterdi resmı bekitkenin málim etti.

– Qazir Densaýlyq saqtaý mınıstrligi mamandarmen bekitilgen naqty resmı keńesterdi ázirledi. Ol Densaýlyq saqtaý mınıstrliginiń saıtyna jarıalanady. Áleýmettik jeliler arqyly da halyqqa jetkiziledi. Ol da (dáriger Aına Bakeeva) em-dom hattamasyn óz resýrstary arqyly azamattarǵa jetkizetinin aıtty, – dedi mınıstr.

Buǵan deıin Aına Bakeeva KVI naýqastaryn emdeýge qatysty syn aıtyp, áleýmettik jelilerge vıdeo jarıalaǵan bolatyn.