Almaty ákimi Baqytjan Saǵyntaev qala dárihanalarynda kezektiń kóbeıýine baılanysty túsinikteme berdi. Bul týraly ol Facebook paraqshasynda jazdy.

– Qurmetti almatylyqtar! Birqatar dárihanalarda kezek kóbeıip, jurt arasynda dúrligý baıqaldy. Osy jáıtke túsinikteme bere ketsem deımin. Suranysqa ıe preparattarǵa degen qajettilikti turaqtandyrý úshin 1 shildeden bastap dárihanalarǵa 475 myń dana áleýmettik mańyzy bar preparattar, sonyń ishinde 260 myń parasetamol, 98 myń aspırın, 35 myń ıngavırın, 22 myń azıtromısın, 15 myń kardıomagnıl jáne basqa da dári-dármekter tústi. Sondaı-aq dárihanalarǵa 30 myń termometr qoıyldy. Qoımalarda áleýmettik mańyzy bar 645 myń dári-dármek, sonyń ishinde 301 myń aspırın, 84 myń kardıomagnıl, 73 myń parasetamol, 42 myń ıbýprofen, 26 myń amoksıklav jáne basqa da dári-dármekter bar, – dedi shahar basshysy.