Búgin, 8 shildede Reseı Qazaqstanǵa gýmanıtarlyq júk jiberdi. Bul týraly Qazaqstan syrtqy ister mınıstrligi habarlady.

Mınıstrlik saıtynda jarıalanǵan aqparatqa súıensek, gýmanıtarlyq júk Qazaqstan premer-mınıstri Asqar Mamınniń Reseı Úkimetiniń tóraǵasy Mıhaıl Mıshýstınmen COVID-19-ǵa qarsy is-qımyl boıynsha birlesken ýaǵdalastyqtarynyń jalǵasy retinde jiberilgen.

"Reseı Federasıasy gýmanıtarlyq júginde medısınalyq maska, qorǵanys kıimderiniń jıyntyǵy men medısına preparattary bar. Qazaqstandaǵy gýmanıtarlyq kómektiń biryńǵaı operatory "SQ-Farmasıa" JSHS bolyp tabylady" delingen mınıstrlik habarlamasynda.

Buǵan qosa, mınıstrlik jaqyn arada Reseı taǵy birneshe reıs gýmanıtarlyq júk jetkizetinin atap ótti.

Sońǵy resmı aqparatqa saı, Qazaqstanda koronavırýs juqtyrǵandar sany 51 myńnan asty. Qazir elde koronavırýspen birge pnevmonıa da órship tur. Dárihanada dári, aýrýhanada oryn jetispeı jatyr. 5 shildeden bastap elde qaıtadan karantın jarıalandy.