Aqtóbe oblysy boıynsha 2 myńnan astam adam pnevmonıadan emdelip jatyr. Bir táýlikte 100-ge jýyq adam emdeý ornyna jetkizilgen dep habarlady QazAqparat.

Aqtóbe oblysy ákiminiń keńesshisi Áset Qalıevtiń aıtýynsha, óńirde pnevmonıaǵa baılanysty jaǵdaı ázirge kúrdeli. Biraq jergilikti atqarýshy organ bárin baqylap otyr.

"Ókpe qabynýy dertine shaldyǵyp, aýrýhanaǵa túskender sany azaımady. Biraq ósim de joq. Bári turaqty. Ótken táýlikte 98 adam jatqyzyldy. Dálirek aıtsaq, Aqtóbe oblysy boıynsha 2 649 naýqas em alyp jatyr, onyń 761-i ambýlatorıada. Aýdandarda 618 naýqas tirkelip tur. Dári-dármek jetkilikti. Aldaǵy aılarǵa josparlanǵan antıbıotıkter jetkizildi. Kezek bar, ol máseleni bilip otyrmyz. Jyljymaly keshen jumysyn bastady. Bul suranysty tolyq qamtyp, qyzmet kórsetý sapasyn arttyrady dep oılaımyz",- dedi oblys ákiminiń keńesshisi Áset Qalıev.

Aıta keteıik, óńirde 46 rentgen apparaty bar. Onyń 18-i provızorlyq stasonarda tur.