Memleket basshysy Qasym-Jomart Toqaev respýblıkalyq telearnalardyń birinen qazaqstandyqtarǵa úndeý jasady. 

– Koronavırýstyń taralýyna baılanysty densaýlyq saqtaý júıesine kóp aýyrtpalyq túsip jatyr. Ashyǵyn aıtý kerek, densaýlyq saqtaý júıesi indetke toıtarys berýge daıyn bolǵan joq. Birqatar elde karantın tártibi qaıta kúsheıtilip, áýe-kólik qatynasy qaıtadan shekteldi. Ókinishke qaraı, bizdiń eldegi jaǵdaı da ońaı bolyp turǵan joq... Jaǵdaıdyń turaqtalatyny sózsiz. Onyń alǵashqy belgileri de bar. Sondyqtan aldaǵy eki apta bizdiń bolashaq qadamdarymyz úshin sheshýshi kezeń bolmaq. Barlyq azamatty taǵy da karantın erejelerin saqtaýǵa shaqyramyn. İndetpen kúrestiń nátıjeli bolýy, eń aldymen barsha jurttyń sanaly áreketi men jaýapkershiligine baılanysty, – dedi Prezıdent.

Onyń aıtýynsha dárigerler buqaralyq aqparat quraldary arqyly azamattarǵa naqty birizdi málimet berýi kerek.

– Dertti emdeýdiń túrli joldaryn kórsetip adamdardyń densaýlyǵyna qaýip tóndirýge bolmaıdy. Mundaı áreketterge tosqaýyl qoıý kerek. Qylmystyq Kodekstiń 174 babyna sáıkes jalǵan aqparat taratqan adam jaýapkershilikke tartylady. Quqyq qorǵaý organdary el ishindegi osyndaı jónsizdikterge qatań sharalar qoldanady. Sol syndy dárilerdiń baǵasyn birneshe esege ósirip, qalyptasqan jaǵdaıda, óz maqsatynda paıdalanǵysy kelgen alypsatarlardy da quqyq qorǵaý organdary meniń tapsyrmama sáıkes jaýapqa tartyla bastady. Qazir memlekettik organdar eldi mekenderdi qajetti dári-dármektermen qamtamasyz etýde, – dedi Toqaev.

Aıta keteıik, sońǵy ýaqytta dárihanalarda parasetamol, aspırın, sıtramon sekildi dene qyzýyn túsirýge arnalǵan dáriler tapshy. Turǵyndar qajetti preparattarǵa qol jetkize almaı dárihanalar aldynda uzyn-sonar kezekte turǵany habarlanǵan bolatyn.