Soltústik Qazaqstan oblysynda dári-dármekti kóterińki baǵamen satý faktisi anyqtaldy. Bul týraly qarjy mınıstrliginiń qarjy monıtorıńi komıteti habarlady.

Komıtettiń habarlaýynsha, Soltústik Qazaqstan oblysy boıynsha ekonomıkalyq tergeý departamenti qyzmetkerleri polısıamen birlesip, dári-dármekterdiń qymbat baǵada jáne olardyń shyǵý zańdylyǵyn rastaıtyn qujattarsyz satylǵandyǵyn anyqtaǵan.

Komıtet habarlamasynda vırýsqa qarsy qoldanylatyn 5640 teńge turatyn Ingavırın dárisi 6500 teńgeden, al 1217 teńge turatyn Azıtromısın antıbıotıginiń bir qaptamasy 2500 teńgeden satylǵany aıtylǵan.

Qazir osy fakti boıynsha tergeý júrip jatyr. 

Qazaqstanda koronavırýs pen pnevmonıa órshigen tusta dárihanadan kerekti dári-dármegin tappaı júrgender kóbeıdi. Qazir eldiń iri qalalaryndaǵy dárihanalarda dári tapshy. 7 shildede eldiń densaýlyq saqtaý mınıstri Alekseı Soı jaqyn kúnderi barlyq dárihanalarǵa dári jetkiziletinin málimdegen. Biraq elde dári tapshylyǵy áli joıylmaı tur.