Qazaqstanda koronavırýsqa baılanysty jarıalanǵan karantın merziminiń uzartylý-uzartylmaýy kelesi aptada belgili bolady. Bul týraly búgin ortalyq komýnıkasıalar ortalyǵynda ótken brıfıńte eldiń densaýlyq saqtaý mınıstri Alekseı Soı málimdedi. 

Onyń aıtýynsha, elde 5 shildeden bastap jarıalanǵan eki aptalyq karantın nátıjesi kelesi aptada belgili bolady. Bılik shekteý sharalarynyń merzimin uzartý ne uzaratpaý týraly sol kezde sheshim qabyldaıdy.  

– Karantındi uzartýǵa qatysty aıtar bolsam, bastapqyda usynys engizgende azamattardyń tilekteri eskerildi. Rejımniń bıznes qoǵamdastyqtarǵa da barynsha beıimdi bolýy kózdeldi. Degenmen vırýsqa shaldyǵýdyń kúrt órship ketýin eńserýge septigin tıgizetin shekteý sharalary da qarastyryldy. Qazir biz qandaı da bir aralyq nátıjelerdi qarap otyrmyz. Degenmen shynaıy tıimdiligin ekinshi aptaǵa qaraı ne bolmasa baǵalaý júrgizgennen soń birden kóretin bolamyz. Karantın aıaqtalǵannan keıin onyń uzartylatyny nemese sharalardyń qatańdatylatyny túsinikti bolady, – dedi mınıstr.

Qazaqstanda 5 shildeden bastap eki aptalyq karantın rejımi engizilgen. Bılik shekteý sharalaryn kúsheıtkenine qaramastan elde koronavırýs áli órship tur. Sońǵy táýlikte 2000-ǵa jýyq adamnyń osy indetti juqtyrǵany anyqtalǵan.