Almaty oblysynda erteń, 11 shildeden bastap eki kúnge qatań karantın sharalary engiziledi. Bul týraly oblys ákiminiń baspasóz hatshysy Ǵalymurat Júkel óziniń facebook paraqshasynda habarlady.

– 11 shildeden bastap oblys aýmaǵynda barlyq óndiris, saýda, demalys oryndary jabylady. Taldyqorǵandyqtar jıi baratyn komýnaldyq bazar jumysy da toqtatylady. Qoǵamdyq kólik júrmeıdi. Tek úı mańyndaǵy azyq-túlik dúkenderi ǵana isteıdi. Mundaǵy maqsat – koronavırýstyq jáne pnevmonıalyq ınfeksıanyń taralý tizbegin toqtatý. Qala turǵyndary men qala qonaqtarynan eki kún eshqaıda shyqpaýyn suraımyz. Eki kúndik karantın sharalaryn buzǵan, sebepsiz úıinen shyqqandarǵa aıyppul salynady, –  dedi Ǵalymurat Júkel.

Resmı derek boıynsha,  Almaty oblysynda 2939 adamnan koronavırýs anyqtalǵan. Osy ýaqyt deıin olardyń 1562-i aýrýdan aıyǵyp, tórteýi qaıtys bolǵan.

Oblysta sondaı-aq pnevmonıanyń taralýy da órship tur. Bul dertke shaldyqqandar týraly naqty aqparat joq. Biraq búgin oblys ákiminiń orynbasary Serikjan Beskempirov jáne oblystyń bas sanıtar dárigeri Qaırat Baımuhambet pnevmonıadan qaıtys boldy.

Budan bólek, oblys ákimi Amandyq Batalov entigý men júrek qan tamyrlarynyń jetkiliksizdigi dıagnozy boıynsha Nur-Sultandaǵy kardıologıa ortalyǵynda emdelip jatyr.