Batystyń jetekshi iri basylymdary "Qazaqstanda ólim mólsheri COVID-19-dan da joǵary belgisiz vırýs paıda boldy" dep jarysa jazdy.

Álemdik iri buqaralyq aqparat quraldary CNN, The Mirror, Daily Express, Business Insider, ITV, The Sun gazeti jáne nemistiń jetekshi DW sekildi aqparat resýrstary "Qazaqstanda koronavırýsqa qaraǵanda qaýipti ári belgisiz pnevmonıa keńinen taralyp jatyr" degen mazmunda aqparat jarıalady.

Bul derekter Qazaqstannyń densaýlyq saqtaý mınıstri Alekseı Soıdyń "2020 jyldyń alǵashqy jarty jyldyǵynda pnevmonıadan 1172 adam qaıtys boldy" degen málimdemesinen keıin paıda boldy.  Alekseı Soı keltirgen derekke sáıkes, pnevmonıadan qaıtys bolǵandar koronavırýs óliminen bes esege kóp, sebebi resmı statısıka boıynsha qazirge deıin Qazaqstanda COVID-19-dan kóz jumǵandar sany 264.

Bir qyzyǵy, 3 shilde kúni QR bas sanıtar dárigeri Aıjan Esmaǵambetova 2020 jyldyń alǵashqy alty aıynda 1772 adamnyń, maýsymda 628 adamnyń pnevmonıadan qaıtys bolǵanyn aıtqan. Bul esep boıynsha, pnevmonıadan kóz jumǵandar COVID-19-dan qaza tapqandardan 7 ese kóp.

Osylaısha, Alekseı Soı men Aıjan Esmaǵambetova bergen statısıkalar ártúrli.

Osydan keıin alǵash bolyp Qytaı elshiligi "osy jyldyń birinshi jartyjyldyǵynda Qazaqstanda 1772 adam pnevmonıadan ajal qushty, tek maýsym aıynda ǵana 628 adam óldi, onyń ishinde Qytaı azamattary da bar" dep Qytaı azamattaryna dabyl qaqqan. 

Brıtanıalyq The Mirror basylymy " koronnavırýstan da qaýipti, ólimge ákeletin belgisiz pnevmonıa Qazaqstanda  tez taralyp jatyr" dep málimdese, CNN telearnasy "Qazaqstan densaýlyq saqtaý mınıstrligi jáne basqa agenttikter salystyrmaly zertteý júrgizip jatyr jáne pnevmonıa vırýsynyń sebebi belgisiz" dep habarlaǵan.

Business Insider, The Sun, ITV jáne germanıalyq jetekshi BAQ DW " Qazaqstanda COVID-19 ólim mólsherinen anaǵurlym joǵary aýrý tarap jatyr" degen taqyryppen maqala jarıalaǵan. The Express basylymy "Qazaqstanda  belgisiz pnevmonıanyń 32 000 oqıǵasynan keıin Qytaı dabyl qaǵýda. Ortalyq Azıa elinde ólim-jitim deńgeıi koronavırýstan áldeqaıda joǵary belgisiz pnevmonıa paıda boldy" dep aqparat taratqan.

Al, ulybrıtanıalyq Daily Mail basylymy " Qazaqstanda belgisiz vırýs paıda boldy, myńdaǵan adamdar aýyryp, qaıtys bolyp jatyr" degen mazmundaǵy taqyryppen jańalyq jarıalaǵannan keıin, kóp ótpeı ol taqyrypty ózgertip " Qytaı densaýlyq saqtaý mamandary Qazaqstanda taralyp jatqan belgisiz pnevmonıany shyn máninde COVID-19 dep sanaıdy" dep aqparat taratqan.

– Búgin keshte Beıjińdegi Qytaıdyń bas epıdemıology Ý Szúnú Qazaqstanda taralǵan «belgisiz pnevmonıa» epıdemıologıalyq turǵydan COVID-19 dep sanaıtynyn jetkizdi,– dep málimdegen Londonda shyǵatyn basylym.

Bas epıdemıolog Qazaqstan týraly jańalyqtardy baıqaǵanyn jáne ınternettegi tıisti aqparattardy oqyǵanyn aıtqan.

Ol sonymen birge Qazaqstandaǵy «belgisiz pnevmonıadan» bolǵan ólim-jitim deńgeıi COVID-19-ǵa uqsas ekenin jetkizgen.

Al, Ulybrıtanıalyq maman da Qazaqstandaǵy jaǵdaılardyń anyqtalmaǵan COVID-19 ınfeksıasy dep senetinin jarıalaǵan. Ýorvık ýnıversıtetiniń vırýsology jáne onkology profesor Loýrens Iang MailOnline-ǵa suhbat berip, " belgiszi pnevmonıanyń" COVID-19-ǵa qatysy joqtyǵyna sený qıyn ekenin málimdegen.

Qazaqstandyq neırohırýrg dáriger Myńjylqy Berdiqojaev "pnevmonıadan qaıtys bolyp jatqan adamdardyń 99 paıyzynyń ólimine koronavırýs sebep" dep sanaıdy.

Qazaqstan qoǵamynda bılik koronavırýs statısıkasyn azaıtyp, olardy pnevmonıa dep kórsetip jatyr degen pikir bar. Oǵan qosa, resmı statısıka boıynsha, pnevmonıadan qaıtys bolǵandardyń sany COVID-19-dan kóz jumǵandardan bes ese, tipti, jeti esege deıin kóp bolýy, árıne, álemniń nazaryn Qazaqstanǵa aýdarady. Tipti, keıbir elderde "Qazaqstannan abaılańdar, ol memlekette koronavırýstan da qaýipti jańa vırýs paıda boldy" degen eskertýler bastalyp ketken.