Qazaqstannyń densaýlyq saqtaý mınıstrligi ókpesi qabynyp aýyryp jatqan naýqastardy koronavırýs emes, pnevmonıa deýden tanbaı otyr. Alaıda Dúnıejúzilik densaýlyq saqtaý uıymy, Qazaqstan jáne shetel ǵalymdary elde jappaı taralyp jatqan pnevmonıa dertiniń is júzinde koronavırýs ekenin málimdedi.

Qazaqstanda sońǵy resmı derekke saı, 56 455 adamnan COVID-19 anyqtalǵan. Onyń ishinde 32 500 naýqas aýrýdan aıyǵyp shyqsa, 264 adam indetten kóz jumǵan. Bul koronavırýs pandemıasy endi bastalǵan shaqta densaýlyq saqtaý mınıstrligi boljaǵan mejeden 16 esege kóp.

Al elde pnevmonıadan kóz jumǵandardyń sany jarıalanbady. Densaýlyq saqtaý mınıstri "naqty derekti habarlaımyz" degenimen, aqparat áli shyqqan joq. Tek jyl basynan beri 6 aıda atalǵan syrqattan mert bolǵandar statısıkasy aıtyldy. Alaıda onyń ózi ala-qula. Máselen, 3 shildede Qazaqstannyń bas sanıtar dárigeri Aıjan Esmaǵambetova elde sońǵy jarty jylda pnevmonıadan 1 772 adam ajal qushqanyn málimdegen. Al densaýlyq saqtaý mınıstr Alekseı Soı 9 shildede ótken brıfıńte sońǵy alty aıda 1 172 adamnyń pnevmonıadan qaıtys bolǵanyn aıtqan.

Bas sanıtar Aıjan Esmaǵambetovanyń dereginshe, pnevmonıadan kóz jumǵandar COVID-19-dan qaza tapqandardan 7 esege, mınıstr málimeti boıynsha pnevmonıadan qaıtys bolǵandar koronavırýs óliminen 5 esege artyq.

Bul málimdemelerden keıin, resmı derekti negizge alyp aldymen Qytaı, artynsha batystyń on shaqty iri baspasóz quraly Qazaqstanda ólim kórsetkishi koronavırýstan da joǵary ókpe aýrýy ıaǵnı pnevmonıa tarap jatqany týraly jazdy.

Keıin ulybrıtanıalyq Daily Mail basylymy aǵylshyn jáne qytaı medısına mamandarynan suhbat alyp, mamandarynyń "Qazaqstanda taralyp jatqan pnevmonıa is júzinde COVID-19" degen qorytyndysyn jarıalaǵan.

Al dúnıejúzilik densaýlyq saqtaý uıymy juma kúni Qazaqstandaǵy ókpe aýrýyn COVID-19 dep sanaıtynyn málimdedi.

DDSU tótenshe jaǵdaı baǵdarlamasynyń jetekshisi Maık Raıannyń sózinshe, Qazaqstandaǵy COVID-19 qozǵalysynyń joǵary traektorıasy pnevmonıanyń shyn máninde COVID-19-dyń anyqtalmaǵan jaǵdaılary ekenin bildiredi.

Buǵan deıin qazaqstandyq neırohırýrg dáriger Myńjylqy Berdiqojaev "pnevmonıadan qaıtys bolyp jatqan adamdardyń 99 paıyzynyń ólimine koronavırýs sebep" ekenin málim etken.

Qamshy portaly osy rette Dúnıejúzilik densaýlyq saqtaý uıymynyń, Qazaqstan jáne shetel ǵalymdarynyń málimdemelerin negizge alyp, prezıdent Qasym-Jomart Toqaev pen densaýlyq saqtaý mınıstri Alekseı Soıdy Qazaqstandaǵy pnevmonıany koronavırýs dep tanýǵa shaqyrady.