Qazaqstandaǵy Qytaı elshiligi elde taraǵan pnevmonıany "Qazaqstan vırýsy" dep ataǵan. Bul týraly Qamshy tilshisi brıtanıalyq Daily Mail basylymyna silteme jasap habarlaıdy. 

Brıtanıalyq basylymnyń jazýynsha, Qazaqstandaǵy Qytaı elshiligi "Qazaqstanda ólim kórsetkishi koronavırýstan da joǵary, qaýipti vırýs tarady" degen málimdeme jarıalaǵan kezde, bastapqyda "qazaqstandyq pnevmonıa vırýsy" dep jazǵan. Keıinirek bul tujyrymdamasyn "COVID emes pnevmonıa" dep ózgertken. 

Al aǵylshyn tilinde shyǵatyn qytaılyq Global Times basylymynyń aqparatynsha, elshiliktiń málimdemesinen keıin keıbir qytaılyq sarapshylar pnevmonıanyń Qytaıǵa taralýyn boldyrmaý úshin sharalar qabyldaý kerek ekenin aıtyp, Qazaqstan men Qytaıdyń soltústik-batysyndaǵy Shyńjańnyń shektesetinin eskertken. 

Qytaı elshiliginiń "Qazaqstanda koronavırýstan da qaýipti vırýs taraldy" degen málimdemesinen keıin Batys BAQ-tary "Ortalyq Azıa elinde ólim kórsetkishi koronavırýstan joǵary jańa vırýs paıda boldy" degen mazmundaǵy aqparattardy jarysa jarıalaǵan. 

Bul aqparattar Qazaqstannyń densaýlyq saqtaý mınıstri Alekseı Soıdyń "2020 jyldyń alǵashqy jarty jyldyǵynda pnevmonıadan 1172 adam qaıtys boldy" degen málimdemesinen keıin paıda boldy. Alekseı Soı keltirgen derekke sensek, pnevmonıadan qaıtys bolǵandar koronavırýs óliminen bes esege kóp, sebebi resmı statısıka boıynsha qazirge deıin Qazaqstanda COVID-19-dan kóz jumǵandar sany 264.

Al 3 shilde kúni QR bas sanıtar dárigeri Aıjan Esmaǵambetova 2020 jyldyń alǵashqy alty aıynda 1772 adamnyń, maýsymda 628 adamnyń pnevmonıadan qaıtys bolǵanyn aıtqan. Bul esep boıynsha, pnevmonıadan kóz jumǵandar COVID-19-dan qaza tapqandardan 7 ese kóp.

Resmı statısıka boıynsha, pnevmonıadan qaıtys bolǵandardyń sany COVID-19-dan kóz jumǵandardan bes ese, tipti, jeti esege deıin kóp bolýy, árıne, álemniń nazaryn Qazaqstanǵa aýdarady. Tipti, keıbir elderde "Qazaqstannan abaılańdar, ol memlekette koronavırýstan da qaýipti jańa vırýs paıda boldy" degen eskertýler bastalyp ketken.

Alaıda osy aqparattardan keıin Londonda shyǵatyn Daily Mail basylymy brıtanıalyq jáne qytaılyq epıdemıologtardan suhbat alyp, medısınalyq mamandar Qazaqstanda taralǵan pnevmonıany shyn máninde COVID-19 dep sanaıtynyn jarıalaǵan.

Beıjińdegi Qytaıdyń bas epıdemıology jáne Ulybrıtanıa Ýorvık ýnıversıtetiniń vırýsology Qazaqstanda taralyp jatqan "belgisiz pnevmonıany" epıdemıologıalyq turǵydan COVID-19 dep tujyrymdaıtynyn jetkizgen. 

Qazaqstandyq neırohırýrg dáriger Myńjylqy Berdiqojaev "pnevmonıadan qaıtys bolyp jatqan adamdardyń 99 paıyzynyń ólimine koronavırýs sebep" dep aıtqan.

Al juma kúni Dúnıejúzilik densaýlyq saqtaý uıymy Qazaqstandaǵy "belgisiz pnevmonıany" is júzinde anyqtalmaǵan COVID-19 dep málimdegen.