Qazaqstan prezıdentiniń shtattan tys keńesshisi Oljas Qudaıbergenov eldegi bolyp jatqan jaǵdaıdy "sumdyq tragedıa" dep atady. Bul týraly ol Facebook paraqshasynda jazdy.

– Meniń nemere aǵam keshe qaıtys boldy. Artynda tórt balasy qaldy. Sonymen qatar birer kún buryn eki dosymnyń ákesi, áriptesimniń anasy qaýipti indetten kóz jumdy. Al búgin sumdyq kún boldy. Meniń tanystarymnan jalpy 11 adam qaıtys boldy. Bir saǵat buryn 11-shi adamnyń kóz jumǵany týraly habar keldi. Taǵy bir jaqsy adamnyń 39 jastaǵy jalǵyz uly ómirden ótti. Qazirgi bolyp jatqan jaǵdaılar – sumdyq tragedıa. Erte me, kesh pe bárimiz ómirden ótemiz. Eger de barlyq jaǵdaıdy jasap qaıtys bolsa, onda másele basqa. Al adamdar dári-dármek jetispeýshiliginen, tynys aldyrý apparatynyń joqtyǵynan nemese aýrýhanaǵa jatý úshin dáriger men tósek-oryn tapshylyǵynan máseleniń sheshilgenin kútip jatyp kóz jumsa, bul – qasiret. Bul ıtalıanyń senarıi emes, bul ondaǵan jyl boıy búrokratıa men jaýapsyzdyq jemqorlyqqa ulasqan osyndaı qaıǵyly statısıka kórsetetin bizdiń óz senarıimiz, – dep jazdy jelidegi paraqshasynda.

Onyń aıtýynsha bolyp jatqan jáıttardyń eń ókinishtisi dári-dármekke sońǵy aqshasyn jumsap jatqan adamdar.

– Eń ókinishtisi dári-dármekke sońǵy aqshasyn jumsap jatqandar jáne sol dárini qaryzǵa alatyn adamdar. Ókinishke oraı, bizdiń úkimet tólem jasaý úshin quqyqtyq negizderdi kórmeıdi. Al adamdar moraldyq negizderdi kórmeı, osyndaı kózqarastaǵy jumysyn jalǵastyrady. Úkimettegi adamdar otstavkaǵa ketip, ornyna jańa adamdar kelse de bılikte ózgeris bolmaıdy. Ol úshin jańa adamdar men jańa erejeler bolýy kerek. Sonda ǵana koronavırýs ınfeksıasynyń kelesi tolqyny munsha qaıǵyly bolmaıdy, – dedi prezıdenttiń shtattan tys keńesshisi.