Almatyda "Jas Otan" músheleri "Dárigerlerge myń alǵys" aksıasyn jalǵastyrdy.

Eriktiler qaıyrymdylyq aksıasy aıasynda 800-den astam densaýlyq sebetin daıyndady. Aksıanyń alǵashqy kúninde 250 dárigerge densaýlyq sebeti tabys etildi. Dárigerlerge ımýnıtetti nyǵaıtýǵa arnalǵan taǵamdar: bal, lımon, qurma, shokolad, jent berildi.

– Aksıanyń máni – 4 aıǵa jýyq ýaqyt boıy óz ómirin qaterge tigip, búgingi qoǵamnyń batyrlaryna aınalǵan aq halatty abzal jandarǵa jastar atynan alǵys aıtý, qoldaý kórsetý. Álemdi jaýlaǵan COVID-19 koronavırýs ınfeksıasy eshkimdi beıjaı qaldyrmady. Osyndaı syn saǵatta birinshi kezekte aq halatty abzal jandar ózgelerdiń ómiri úshin aıanbaı kúresýde,–deıdi "Jas Otan" Almaty bólimshesiniń tóraǵasy Mádı Ahmetov.

– Búgingi tańda Qazaqstanda koronavırýsty juqtyrǵandardyń sany 65 myńnan asty. Biraq medısına qyzmetkerleriniń qajyrly eńbeginiń arqasynda kóp adamdar aıaqqa turdy. Dárigerler adam ómiri úshin táýlik boıy kúresýde. Bul qaıyrymdylyq aksıasymen biz dárigerlerge jylý syılap, qoldaý kórsetip, birge ekendigimizdi jetkizgimiz keledi,– deıdi erikti Bıbinur Sherbaeva.

Aksıanyń alǵashqy kúninde jasotandyq volonterler ortalyq qalalyq klınıkalyq aýrýhanaǵa, qalalyq klınıkalyq juqpaly aýrýlar aýrýhanasyna jáne qalalyq juqpaly aýrýlardyń klınıkalyq balalar aýrýhanasynyń qyzmetkerlerine densaýlyq jıyntyǵyn tabystady.

Bul sharaǵa Almaty qalasy boıynsha koronavırýstyń aldyn alý vedomstvoaralyq komısıasy qoldaý kórsetti. Al densaýlyq sebetterin tabystaýǵa arnaıy daıyndyqtan ótken eriktiler jumyldyryldy.

Olardyń árqaısysy qorǵanysh quraldarymen qamtamasyz etilgen. Aksıa barysynda barlyq saqtyq sharalary eskerildi.