Shyǵys Qazaqstan oblysynyń ákimi Danıal Ahmetov oblystyq máslıhat sesıasyna qatysty. Mańyzdy máselelerdi talqylaǵan soń ákim óz Facebook paraqshasynda qyrkúıek-qazan aılarynda keletin koronavırýstyń ekinshi tolqynyna tolyq daıyn ekenin jazdy.
"Oblystyq máslıhat sesıasy barysynda birqatar mańyzdy máseleler talqylandy. Birinshi kezekte, koronavırýs ınfeksıasyn taratpaý boıynsha suraqtar qaraldy. Búgingi tańda oblystyń keıbir aýdandarynda epıdemıologıalyq jaǵdaı kúrdeli bolyp otyr, alaıda biz ınfeksıalyq tósek oryn sanyn 1886-ge deıin, provızorlyq tósek oryn sanyn 2423-ge deıin arttyrý boıynsha barlyq sharalardy qabyldadyq. Barlyq medısınalyq mekemelerde reanımasıalyq tósekter ashylǵan, tamyz aıyna qaraı biz jalpy somasy 1,5 mıllıard teńgege ottegi konsentratorlary, monıtorlar, púlsoksımetrler, ÓJJ jáne rentgen apparattary túrindegi qosymsha jabdyq alamyz. Biz barlyq dárigerlerimizdi jumysqa tarttyq, kúndelikti dárihanalarda qajetti dári-dármekterdiń bolýyna monıtorıń júrgiziledi. Búgingi kúni bizdiń barlyq medısına qyzmetkerleri arnaıy kıimmen jáne qorǵanys quraldarymen qamtamasyz etilgen. Biz qyrkúıek-qazan aılarynda keletin ekinshi tolqynǵa tolyq daıynbyz" delingen ákim jazbasynda.
Resmı derekke saı, elde 68 703 adam koronavırýs indetin juqtyrǵan. Olardyń ishinde 42 388 adam aýrýynan aıyqty. Al qaıtys bolǵandar sany 375 adamǵa jetti.
